Xorazmda IIO xodimi 4,5 ming dollar bilan ushlandi

O‘zbekistonda ishga joylashtirish, turli ruxsatnomalarni rasmiylashtirish hamda ijtimoiy nafaqa tayinlash jarayonlari bilan bog‘liq bir qator korrupsiya holatlari aniqlandi. Bu haqda DXX ma’lum qildi.

 

Qayd etilishicha, Davlat xavfsizlik xizmati xodimlari tomonidan Bosh prokuratura huzuridagi Departament hamda ichki ishlar organlari bilan hamkorlikda hududlarda tezkor tadbirlar o‘tkazilgan.

 

 

Xorazm viloyatida aniqlangan holatda, viloyat IIB Jamoat tartibini saqlash boshqarmasi kichik inspektori o‘z xizmat mavqeidan foydalanib, fuqaroning ishonchiga kirgan. U fuqaroning tanishini ichki ishlar organlariga ishga joylashtirib berishni va’da qilib, 4,5 ming AQSH dollari talab qilgan. Tezkor tadbir davomida inspektor oldindan 1 800 AQSH dollari va 2,4 mln so‘m olgan vaqtida ushlangan.

 

 

Toshkent viloyatidagi holatda esa tuman maktabgacha va maktab ta’limi bo‘limi metodisti xususiy oilaviy bog‘cha tashkil etmoqchi bo‘lgan fuqarodan ruxsatnoma olib berish evaziga pul talab qilgan. U sanitariya talablariga moslik bo‘yicha hujjat tayyorlash uchun 1,5 mln so‘m, yong‘in xavfsizligi bo‘yicha ijobiy xulosa olish uchun esa 200 AQSH dollari so‘ragan. Metodist pul mablag‘larini olgan vaqtida ushlangan.

 

 

Shuningdek, tezkor tadbir davomida ushbu mablag‘ning bir qismini olgan tuman Favqulodda vaziyatlar bo‘limi katta inspektori ham qo‘lga olingan.

 

 

Qoraqalpog‘iston Respublikasida ham shunga o‘xshash holat qayd etilgan. Chimboy tumanida yashovchi ayol Kegeyli tumani fuqarosiga yoshga doir nafaqa tayinlab berishda ish stajini sun’iy ravishda ko‘paytirishni va’da qilib, 7 mln so‘m olgan vaqtida ushlangan. Ma’lum bo‘lishicha, u bu ishni Kambag‘allikni qisqartirish va bandlik vazirligida ishlovchi o‘g‘li orqali amalga oshirishni rejalashtirgan.

 

Hozirda barcha holatlar yuzasidan jinoyat ishlari qo‘zg‘atilgan bo‘lib, tergov harakatlari olib borilmoqda.