Mintaqada barqarorlik uchun zudlik bilan o‘t ochishni to‘xtatish zarur — Eron elchixonasi
Eronning O‘zbekistondagi elchixonasi Yaqin Sharqda barqarorlik faqat diplomatiya, muloqot va kollektiv hamkorlik orqali ta’minlanishi mumkinligini bildirdi.
Eron Islom Respublikasining O‘zbekistondagi elchixonasi mintaqada va xalqaro maydonda tinchlik, barqarorlik va uzoq muddatli xavfsizlikni ta’minlashga qaratilgan pozitsiyasini bayon qildi.
Elchixona bayonotida ta’kidlanishicha, hozirgi sharoitda harbiy to‘qnashuvlarni zudlik bilan to‘xtatish, barqaror sulhga erishish hamda inqirozlarning qayta yuzaga kelishini oldini oladigan tekshiriladigan mexanizmlarni ishlab chiqish asosiy ustuvor yo‘nalishlardan biridir.
Qayd etilishicha, Eron tomoni allaqachon mojarolarni to‘xtatish bo‘yicha ko‘p bandli va muddatlari belgilangan taklifni ilgari surgan hamda qarshi tomonning javobini diplomatik kanallar orqali qabul qilgan. Mazkur taklif hozirda o‘rganilayotgani va yakuniy pozitsiya tahlil yakunlangach e’lon qilinishi bildirildi.
Elchixonaga ko'ra, harbiy bosim va xavfsizlik yo‘nalishidagi jarayonlar muammolarni hal qilmaydi, aksincha mintaqada beqarorlikni yanada kuchaytirishi mumkin.
Shuningdek, Eron bosim, sanksiyalar va bir tomonlama siyosat yondashuvlari samarasiz ekanini ta’kidlab, bunday usullar inqirozlarni hal etmagani, aksincha ishonchsizlik va keskinlikni kuchaytirganini qayd etgan.
Bayonotda Eron mintaqadagi beqarorlikka oid ayblovlarni rad etib, o‘zining tinchlik, muzokara va siyosiy yechimlarni qo‘llab-quvvatlashga asoslangan siyosatini davom ettirishini bildirgan.
Shu bilan birga, Isroilning harakatlari mintaqaviy keskinlikni kuchaytiruvchi omillardan biri sifatida tilga olinib, xalqaro huquq doirasida javobgarlik masalasi ko‘tarilayotgani qayd etilgan.
Eron, shuningdek, Falastin va Livandagi tinch aholini himoya qilish, zo‘ravonliklarni to‘xtatish hamda insonparvarlik yordamining to‘siqsiz yetkazilishini ta’minlashga chaqirgan.
Elchixona fikricha, mintaqaviy xavfsizlik faqat davlatlar o‘rtasidagi hamkorlik, o‘zaro hurmat va tashqi aralashuvlarsiz ta’minlanishi mumkin. Shu nuqtayi nazardan, tashqi kuchlar, xususan AQSh siyosatining keskinlikni kuchaytiruvchi omil bo‘lib qolayotgani ta’kidlangan.
Birlashgan Millatlar Tashkiloti kabi xalqaro institutlar keskinlikni kamaytirish va xalqaro huquq buzilishlarining oldini olishda faolroq rol o‘ynashi kerakligi qayd etilgan.
Eron elchixonasi yakunda mintaqada barqarorlik faqat diplomatiya, muloqot va kollektiv hamkorlik orqali ta’minlanishi mumkinligini yana bir bor ta’kidlagan.
