Saida Mirziyoyeva holatini o‘rgangan oilaviy poliklinika rekonstruksiya qilindi
Mazkur bino yarim asr davomida kapital ta’mirlanmagan. 16 ta qishloq aholisiga xizmat ko‘rsatib kelgan.
1972-yilda qurilgan Urgut tumanining “Bahrin” mahallasidagi 21-sonli oilaviy poliklinika 16 ta qishloq aholisi — 13 mingdan ortiq fuqaroga xizmat ko‘rsatib kelgan. Mazkur bino uzoq yillar davomida kapital ta’mirlanmagan.
Avvalgi sharoitlarda binoda namlik, eskirgan derazalar va tomdan suv o‘tishi kabi muammolar mavjud bo‘lgan. Shunga qaramay, poliklinika hudud aholisi uchun yagona tibbiy muassasa sifatida faoliyat yuritgan.
2025-yil dekabr oyida Prezident administratsiyasi rahbari Saida Mirziyoyeva ushbu holatni joyiga chiqib o‘rgangan.
Shundan so‘ng poliklinika binosi to‘liq rekonstruksiya qilinib, qo‘shimcha korpus barpo etildi hamda 20 o‘rinli tug‘ruq bo‘limi tashkil etildi. Yangilangan muassasada aholiga zamonaviy sharoitlarda tibbiy xizmat ko‘rsatish yo‘lga qo‘yildi.
Prezident administratsiyasi rahbari Samarqandga tashrifi chog‘ida yangilangan poliklinikaga tashrif buyurdi. Muassasada tug‘ilgan ilk chaqaloq — Shavkatjonni ko‘rdi.
Saida Mirziyoyeva buni amalga oshirilayotgan ishlarning xayrli ekaniga ishora sifatida baholagandi.
