"Yalla" nomidagi bolalar ansambli tashkil etiladi

Toshkent shahridagi 7-sonli bolalar musiqa va san’at maktabida O‘zbekiston xalq artisti Farrux Zokirov bilan uchrashuv bo‘lib o‘tdi. Tadbirda maktab o‘quvchilari va pedagoglar ishtirok etdi.

 

 

Avvalroq O‘zbekiston Prezidentining PQ-137-son qaroriga muvofiq, mazkur ta’lim muassasasiga Farrux Zokirov nomi berilgani ma’lum qilingan edi.

 

Uchrashuv davomida ishtirokchilar maktab faoliyati, dars jarayonlari va ijodiy muhit bilan tanishdi. Tadbirda madaniyat vaziri Ozodbek Nazarbekov, vazirning birinchi o‘rinbosari Avazxon Tadjixanov hamda soha vakillari ham qatnashdi.

 

 

Tadbir yakunida maktabda badiiy-pedagogik kengashning birinchi yig‘ilishi o‘tkazilib, o‘quv-tarbiya jarayonini rivojlantirish va yosh iste’dodlarni qo‘llab-quvvatlashga qaratilgan bir qator masalalar ko‘rib chiqildi.

 

 

Jumladan, maktabning moddiy-texnik bazasini mustahkamlash, kapital ta’mirlash ishlarini jadallashtirish, Farrux Zokirov ijodiy merosini notalashtirish va chop etish, shuningdek, “Yalla” nomli bolalar ansamblini tashkil etish bo‘yicha takliflar bildirildi.

 

Bundan tashqari, Yoshlar ijodiy laboratoriyasi hamda “ustoz-shogird” an’analari asosida estrada yo‘nalishi bo‘yicha ijrochilik mahorat maktablari faoliyati yo‘lga qo‘yilishi, maktabda yozgi to‘garak tashkil etilib, hududlardagi bolalar musiqa va san’at maktablarining 3 nafardan eng iqtidorli o‘quvchilarini mazkur to‘garakka jalb etilishi belgilandi.

 

 

Yozgi to‘garakning iqtidorli 5 nafar o‘quvchilari hamda ularning o‘qituvchi va konsertmeysterlarining nufuzli xalqaro tanlovlarda ishtirok etishi bilan bog‘liq xarajatlar Davlat byudjetidan qoplanishi qayd etildi.

 

 

 2026-2027-yillarda tajriba-sinov tariqasida xalqaro nufuzli tanlovlarda g‘olib va sovrindor bo‘lgan Maktab va yozgi to‘garak o‘quvchilari (jamoalari) hamda ularni tayyorlagan o‘qituvchi (konsertmeyster) quyidagi miqdorda bir martalik pul mukofoti bilan rag‘batlantirilishi belgilandi.

 

 

Umumxalq bayram dasturlari va yuqori darajadagi anjumanlarning badiiy qismida Maktab va yozgi to‘garakning iqtidorli o‘quvchilari hamda ijodiy jamoalarining ishtirok etishi rejalashtirildi.