AQSH Eronga zarba berdi, Tehron bunga javob qaytardi
O‘zaro hujumlarga qaramasdan Donald Tramp sulh hali ham amalda ekanini bildirdi.
AQSH va Eron payshanba kuni o‘zaro harbiy zarbalar almashdi. Bu 7-apreldan buyon amal qilib kelayotgan sulh uchun eng jiddiy sinov sifatida baholanmoqda. Bu haqda Reuters xabar berdi.
Ma'lum qilinishicha, Eron harbiylari AQSHni Hormuz bo‘g‘ozidagi ikki kemaga va Eron hududlariga zarba berishda aybladi. Tehron ma’lumotiga ko‘ra, hujumlar Keshm oroli hamda Bandar Xamir va Sirik atrofidagi hududlarda amalga oshirilgan.
Bunga javoban Eron AQSHning Hormuz bo‘g‘ozining sharqiy qismi va Chobahor porti yaqinidagi harbiy kemalariga hujum qilganini ma’lum qildi. Eronning “Xotam al-Anbiyo” markaziy shtabi vakili zarbalar natijasida “katta talafot yetkazilganini” iddao qildi.
AQSH Markaziy qo‘mondonligi (CENTCOM) esa Eron tomonidan raketalar, dronlar va kichik katerlar yordamida uchta AQSH esminesi nishonga olinganini bildirdi. Shu bilan birga, Vashington Eronning raketa va dron obyektlariga javob zarbalari berilganini ma’lum qildi.
“CENTCOM mojaroning yanada keskinlashuvini istamaydi, biroq AQSH kuchlarini himoya qilishga tayyor”, — deyiladi qo‘mondonlik bayonotida.
AQSH prezidenti Donald Tramp esa vaziyatga izoh berar ekan, sulh hali ham saqlanib qolayotganini ta’kidladi.
“Bugun ular biz bilan o‘ynashishga urindi. Biz esa ularni yakson qildik”, — dedi Tramp jurnalistlarga.
Keyinroq Eronning Press TV telekanali Hormuz bo‘g‘ozi yaqinidagi hududlarda vaziyat yana me’yorlashganini xabar qildi.
Tomonlar o‘rtasidagi keskinlik Vashington Tehronning yangi tinchlik taklifiga javobini kutayotgan bir paytda yuz berdi. AQSH taklifida urushni rasman yakunlash ko‘zda tutilgan bo‘lsa-da, Eron yadroviy dasturi va Hormuz bo‘g‘ozining ochilishi kabi asosiy masalalar ochiq qolmoqda.
Tramp muzokaralar davom etayotganini bildirib, Eron yadroviy qurolga ega bo‘la olmasligi bo‘yicha prinsipial kelishuv mavjudligini aytdi.
Shuningdek, yangi harbiy to‘qnashuvlar fonida jahon energetika bozorlarida ham keskin reaksiya kuzatildi. Juma kungi Osiyo savdolarida AQSH neft fyucherslari narxi 3 foizgacha ko‘tarildi. AQSHda benzin narxlari esa fevral oxiridan buyon 40 foizdan ortiq qimmatlagani ma’lum qilindi.
