AQSh Kubaga qarshi sanksiyalarni kuchaytiradi — Rubio
Sanksiyalar Tramp tomonidan imzolangan yangi farmon asosida kuchaytirilmoqda.
AQSh Davlat kotibi Marko Rubio Vashington Kubaga qarshi bir tomonlama sanksiyalarni yanada kuchaytirishni rejalashtirayotganini ma’lum qildi.
U Rim shahrida jurnalistlar bilan muloqot chog‘ida AQSh allaqachon yangi cheklovlarni joriy qilganini hamda bu yo‘nalishda qo‘shimcha choralar ko‘rilishini bildirgan.
Ma’lum qilinishicha, yangi sanksiyalar Kuba iqtisodiyotining qariyb 40 foizini nazorat qiluvchi GAESA konglomerati, uning rahbari hamda nikel qazib olish bilan shug‘ullanuvchi MOA Nickel SA qo‘shma korxonasiga nisbatan qo‘llanilgan.
AQSh tomoniga ko‘ra, ushbu cheklovlar Donald Tramp tomonidan 1-may kuni imzolangan farmon asosida amalga oshirilmoqda. Mazkur hujjat Kubaga qarshi sanksiyalar rejimini sezilarli darajada kuchaytirishni nazarda tutadi.
Shuningdek, farmonda cheklov choralarining ekstraterritorial xususiyatga ega bo‘lishi, ya’ni ayrim holatlarda uchinchi davlatlar va xorijiy kompaniyalarga ham ta’sir qilishi mumkinligi qayd etilgan.
