BAA Eronga yashirin hujumlar uyushtirgan — WSJ
AQSH BAAning urushga kirishini norasmiy tarzda ma’qullagan bo‘lishi mumkin
Birlashgan Arab Amirliklari AQSH va Isroil o‘rtasidagi urush fonida Eronga qarshi bir qator yashirin hujumlar uyushtirgani haqida xabar berildi. Bu haqda Anadolu agentligi The Wall Street Journal maqolasiga tayanib xabar berdi.
Xabarga ko‘ra, hujumlardan biri Eronning Lavan orolida joylashgan neftni qayta ishlash zavodiga qaratilgan bo‘lib, u aprel oyi boshida zarbaga uchragan. O‘sha vaqtda AQSH prezidenti Donald Tramp Eron bilan o‘t ochishni to‘xtatish bo‘yicha kelishuv e’lon qilishi kutilayotgan edi. Zarba oqibatida yirik yong‘in yuz bergan va obyekt vaqtincha ishdan chiqqan.
Manbalarning bildirishicha, Eron mazkur hujumga javoban BAA va Quvayt hududlariga ballistik raketalar hamda dronlar yo‘llagan. Shuningdek, AQSH BAAning urushga kirishini norasmiy tarzda ma’qullagan bo‘lishi mumkinligi ham qayd etilgan.
WSJ ma’lumotiga ko‘ra, Eron mintaqada eng ko‘p aynan BAAni nishonga olgan davlat bo‘lib, Fors ko‘rfazi mamlakatiga 2 800 dan ortiq raketa va dron hujumlari amalga oshirilgan.
Ushbu hujumlar BAA iqtisodiyotiga sezilarli zarar yetkazib, ayrim sohalarda qisqartirish va majburiy ta’til holatlariga sabab bo‘lgan. Bu esa mamlakatning strategik qarashlarida o‘zgarishlarga olib kelgani aytiladi.
Anonim Fors ko‘rfazi rasmiylari fikricha, BAA endilikda Eronni mintaqaviy barqarorlikka tahdid soluvchi “xavfli aktyor” sifatida baholamoqda.
BAA Tashqi ishlar vazirligi mazkur iddaolar yuzasidan izoh bermagan, biroq avvalgi bayonotlarga ishora qilib, mamlakat o‘ziga qilingan har qanday dushmanona harakatga javob berish huquqiga ega ekanini ta’kidlagan.
Yaqin Sharq bo‘yicha tahlilchi Dina Esfandiyoriy esa WSJ’ga bergan izohida, Fors ko‘rfazi davlatlaridan biri urushayotgan tomon sifatida Eronga to‘g‘ridan-to‘g‘ri zarba bergani muhim voqea ekanini qayd etgan.
Uning fikricha, bu holat Tehronni BAA va mintaqadagi boshqa vositachi davlatlar o‘rtasida kelishmovchilik keltirib chiqarishga undashi mumkin.
