Baxtiyor Saidov Eron tashqi ishlar vaziri Abbos Aroqchi bilan telefon orqali muloqot qildi
Tomonlar ikki davlat o‘rtasidagi anʼanaviy do‘stlik va amaliy hamkorlikni kengaytirish masalalarini ko‘rib chiqdi.
O‘zbekiston tashqi ishlar vaziri Baxtiyor Saidov Eron Islom Respublikasi tashqi ishlar vaziri Sayyid Abbos Aroqchi bilan telefon orqali muloqot o‘tkazdi.
Suhbat davomida tomonlar mintaqaviy xavfsizlik va dolzarb xalqaro masalalar yuzasidan fikr almashdi. Barcha masalalarni xalqaro huquq normalariga muvofiq siyosiy-diplomatik yo‘l bilan hal etish muhimligi alohida ta’kidlandi.
Shuningdek, O‘zbekiston va Eron o‘rtasidagi an’anaviy do‘stlik va o‘zaro hurmatga asoslangan munosabatlarni yanada mustahkamlash, savdo-iqtisodiy, transport-logistika hamda boshqa o‘zaro manfaatli yo‘nalishlardagi hamkorlik istiqbollari muhokama qilindi.
Tomonlar ikki mamlakat tashqi ishlar vazirliklari o‘rtasidagi yaqin muloqot va amaliy hamkorlikni izchil davom ettirishga tayyor ekanliklarini bildirdi.
