O‘zbekistonda paxta va bug‘doy yetishtiruvchilarga kredit foizlarining bir qismi qoplab beriladi

O‘zbekistonda 2026-yil hosilidan boshlab fermer xo‘jaliklarini qo‘llab-quvvatlashning yangi mexanizmlari joriy etiladi. Bu prezidentning 8-may kuni imzolangan “Paxta va bug‘doy yetishtiruvchilarni moliyaviy qo‘llab-quvvatlashning qo‘shimcha chora-tadbirlari to‘g‘risida”gi farmonida belgilangan. 

 

Farmonga ko‘ra, paxta va bug‘doy yetishtiruvchilarga ajratiladigan imtiyozli kreditlar foizlarining bir qismi davlat tomonidan kompensatsiya qilinadi. 

 

Shuningdek, dizel yonilg‘isi xarajatlarini qoplash uchun subsidiya ajratish tartibi yo‘lga qo‘yiladi. Jumladan, paxta xomashyosi yetishtirish uchun olingan imtiyozli kreditlarni shartnomada belgilangan muddatda qaytargan xo‘jaliklarga foiz to‘lovining 2,5 foizlik punkti qoplab beriladi. 

 

Kreditlarni hosil yilining 31-dekabriga qadar to‘liq qaytargan xo‘jaliklar esa foiz to‘lovining 5 foizlik punktigacha kompensatsiya oladi.

 

Shuningdek,bug‘doy yetishtirish xarajatlari uchun ajratilgan imtiyozli kreditlarni hosil yilining 1-avgustiga qadar to‘liq qaytargan xo‘jaliklarga foiz to‘lovining 4 foizlik punkti qoplab beriladi.

 

Farmonga muvofiq, paxta xomashyosini xarid qilish uchun paxta-to‘qimachilik klasterlari hamda paxta xomashyosini qayta ishlash va ip-kalava ishlab chiqarish zanjiriga ega korxonalarga ajratilgan tijorat kreditlari bo‘yicha ham foiz xarajatlarining bir qismi kompensatsiya qilinadi. 

 

Bunda kredit stavkasining 8 foiz punktidan yuqori, biroq 16 foiz punktidan oshmagan qismi qoplab berilishi belgilangan.

 

Abdullayeva Shaxrizoda