Qirg'izistonda Qamchibek Tashiyev ishi sudga oshirildi

Qirg‘iziston Milliy xavfsizlik davlat qo‘mitasi (MXDQ) sobiq raisi Qamchibek Tashiyevga oid jinoyat ishi sudga oshirildi. Bu haqda uning advokati Ikramidin Aytqulovga tayanib, 24.kg xabar berdi.

 

Advokatning bildirishicha, Qirg‘iziston Bosh prokuraturasi Tashiyevga nisbatan tayyorlangan ayblov xulosasini tasdiqlagan va ishni Bishkek shahridagi Birinchi may tuman sudiga yuborgan. Ish bo‘yicha sobiq amaldor bilan birga yana yetti kishi ayblanuvchi sifatida o‘tmoqda.

 

Qamchibek Tashiyev hokimiyatni zo‘ravonlik yo‘li bilan egallashga tayyorgarlik ko‘rish hamda mansab vakolatini suiiste’mol qilishda ayblanmoqda.

 

Ma’lum qilinishicha, jinoyat ishi maxfiylashtirilgan. Shu sababli sud majlislari yopiq tartibda o‘tkaziladi va tergov hamda sud jarayoniga oid ma’lumotlarni oshkor qilish taqiqlangan.

 

Eslatib o‘tamiz, Qamchibek Tashiyev joriy yil fevral oyida Qirg‘iziston MXDQ raisi lavozimidan ozod etilgandi. U o‘shanda ishdan bo‘shatilishini kutmaganini aytgan. Qirg‘iziston prezidenti esa Tashiyev davlat xizmatiga qaytmasligini bildirgan.

 

Jogorku Kenesh deputati Elvira Surabaldiyeva sobiq MXDQ rahbari davlat to‘ntarishiga urinishni tashkil qilgani sabab lavozimidan chetlatilganini ma’lum qilgandi.

 

Aprel oyining oxirida Tashiyevga rasman ikki modda bo‘yicha ayblov e’lon qilingan. Ushbu ish doirasida sobiq bosh prokuror Kurmankul Zulushyev hamda parlamentning sobiq spikeri Nurlanbek Turgunbek uulu ham Tashiyev bilan birga so‘roq qilingan.