Fransiyada ona va ikki farzandlari maktabga bostirib kirib, o‘quvchilarga hujum qildi

 

Fransiyaning Tuluza shahridagi maktablardan birida ona va uning ikki farzandi ishtirokida sodir bo‘lgan qurolli hujum yuzasidan tergov boshlandi. Le Figaro xabariga ko‘ra, ular pichoqlar bilan ta’lim muassasasiga bostirib kirib, o‘quvchilarga hujum qilgan.

Dastlabki ma’lumotlarga ko‘ra, voqea maktab nazoratchisi va o‘quvchilardan biri o‘rtasidagi janjaldan so‘ng yuzaga kelgan. O‘smir oilasiga qo‘ng‘iroq qilganidan keyin bir necha daqiqa ichida uning qarindoshlari maktabga kelgan.

Guvohlarning aytishicha, ayol vaziyatni tinchlantirish o‘rniga mojaroning yanada keskinlashishiga sabab bo‘lgan. Shundan so‘ng uch kishi maktab hududiga kirib, nazoratchi hamda ikki nafar voyaga yetmagan qizga hujum qilgan.

Hodisa yuzasidan huquq-tartibot organlari tomonidan tezkor choralar ko‘rilgan va gumonlanuvchilar qo‘lga olingan. Ular guruh bo‘lib qurol bilan ta’lim muassasasiga bostirib kirish hamda zo‘ravonlik sodir etishda ayblanmoqda.

Tuluza prokuraturasi mazkur holat bo‘yicha qotillikka urinish moddasi bilan tergov harakatlari boshlanganini ma’lum qilgan. Politsiya gumonlanuvchilarning avtomobilidan bir nechta pichoq, qassob pichog‘i, ko‘zdan yosh oqizuvchi gaz ballonchasi hamda soxta to‘pponcha topgan.

Rasmiy ma’lumotlarga ko‘ra, jabrlanganlar yengil tan jarohatlari olgan. Shu bilan birga, hodisaning o‘quvchilar va maktab xodimlariga jiddiy psixologik ta’sir ko‘rsatgani qayd etilmoqda.

Voqeadan so‘ng o‘quvchilar uylariga jo‘natilgan. Tuluza ta’lim boshqarmasi barcha xizmatlar xavfsizlikni ta’minlash uchun safarbar qilinganini bildirgan. Maktabda psixologik yordam markazi tashkil etilishi rejalashtirilmoqda.

 

Eslatib o'tamiz, 15-aprel kuni Turkiyaning janubi-sharqidagi Qahramanmarash viloyatidagi maktabda yuz bergan otishmada to'qqiz kishi halok bo'lgan va 21 kishi jarohatlangan edi. 14-aprel kuni Shanliurfa viloyatidagi maktabda o'n to'qqiz kishi jarohat olgani xabar qilingan edi.