Жанубий Кореяга ишга юбориш учун 400 минг доллардан ортиқ маблағни ўзлаштирганлар ушланди
Сурхондарёда 6 та вилоятдан 63 нафар фуқарони чув туширган шахслар аниқланди.
Бош прокуратура ҳузуридаги Департаментнинг Сурхондарё вилояти бошқармаси томонидан ўтказилган терговга қадар текширувда Жанубий Кореяга ишга юбориш билан боғлиқ йирик фирибгарлик ҳолати фош этилди.
Маълум қилинишича, “К.М.” нодавлат таълим муассасаси таъсисчиси Х.Ш.(муқаддам судланган) ва бошқалар олдиндан ўзаро тил бириктирган ҳолда 6 та вилоятда яшовчи 63 нафар фуқаронинг ишончига кирган.
Улар Жанубий Кореяга ишга юборишни ваъда қилиб, фуқаролардан жами 408,8 минг АҚШ долларини фирибгарлик йўли билан қўлга киритган.
Мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилган бўлиб, ҳозирда тергов ҳаракатлари олиб борилмоқда.
