Xorazmda MIB xodimi 1,5 ming dollar pora bilan ushlandi
U fuqaroning soliq qarzdorligini bartaraf qilib bermoqchi bo'lgan.
Xorazm viloyatining Xiva tumanida Majburiy ijro byurosi xodimiga nisbatan jinoyat ishi qo‘zg‘atildi. Bu haqda Davlat xavfsizlik xizmati ma’lum qildi.
Ma’lum qilinishicha, MIBning Xiva tuman bo‘limi davlat ijrochisi xizmat mavqeidan foydalanib, bo‘lim ish yurituvidagi ijro ishi bo‘yicha fuqaroning soliq qarzdorligini bartaraf qilib berishni va’da qilgan.
U 1995-yilda tug‘ilgan fuqaroning undirilishi lozim bo‘lgan 4 mln 526 ming so‘m soliq qarzdorligini, shuningdek, fuqaro va uning otasiga hisoblangan jami 22 mln 822 ming so‘mlik yer hamda mol-mulk soliqlarini mansabdor tanishlari orqali hal qilib berish evaziga 1500 AQSH dollari olgan vaqtida ashyoviy dalillar bilan qo‘lga olingan.
Hozirda unga nisbatan jinoyat ishi qo‘zg‘atilib, tergov harakatlari olib borilmoqda.
