Eron ayrim Xitoy kemalariga Hormuz bo‘g‘ozidan o‘tishga ruxsat berdi
Ma’lumotlarga ko‘ra, chorshanbadan buyon Hormuz bo‘g‘ozidan 30 ta kema o‘tgan.
Eron 28-fevraldan buyon kuchaytirilgan nazorat ostida bo‘lgan Hormuz bo‘g‘ozi orqali ayrim Xitoy kemalarining harakatlanishiga ruxsat berdi. Bu haqda Sinxua axborot agentligi ma’lum qildi.
Qayd etilishicha, chorshanbadan boshlab bir qator Xitoy kemalari Eron tomonidan belgilangan nazorat protokollariga muvofiq bo‘g‘ozdan o‘tishni boshlagan.
Eron Islom inqilobi qo‘riqchilari korpusi dengiz floti vakiliga ko‘ra, shu vaqt davomida Hormuz bo‘g‘ozidan 30 ta kema o‘tgan.
Eslatib o‘tamiz, Eron 28-fevraldan boshlab Isroil va AQSh bilan bog‘liq kemalarga nisbatan cheklovlarni kuchaytirgan edi. Tehron bu qarorni o‘z hududiga qilingan qo‘shma hujumlardan keyin qabul qilganini bildirgan.
Eron tashqi ishlar vaziri Sayid Abbos Aroqchi bo‘g‘oz barcha tijorat kemalari uchun ochiq ekanini, biroq kemalar Eron dengiz kuchlari bilan hamkorlik qilishi lozimligini ta’kidlagan.
Shuningdek, u Eron yuk tashishga to‘sqinlik qilmayotganini, aksincha mintaqadagi blokada AQSh tomonidan amalga oshirilayotganini qayd etgan. Vazir vaziyat diplomatik yo‘l bilan hal etilishiga umid bildirgan.
