Samarqanddagi “Oqbo‘yra” hududida kon portlatish ishlari yuzasidan deputatlik so‘rovi yuborildi

Samarqand tumanidagi “Oqbo‘yra” turizm qishlog‘i hududida kon portlatish ishlari natijasida aholi hayoti va mol-mulkiga zarar yetgani, xavfsizlik talablariga rioya etilmaganligi yuzasidan deputatlik so‘rovi yuborildi.

Ijtimoiy tarmoqlarda tarqalgan ma’lumotlarga ko‘ra, joriy yil 15-aprel kuni amalga oshirilgan tog‘-portlatish ishlari oqibatida fuqarolarning yashash uylariga zarar yetgan. Xususan, ayrim xonadonlarning tom qismiga toshlar kelib tushgan, devorlarda yoriqlar paydo bo‘lgan, eshik va oynalar shikastlangan. Shuningdek, aholi portlatish ishlari oldidan tegishli tartibda ogohlantirilmaganligi qayd etilmoqda.

Ta’kidlanishicha, mazkur hududda kon portlatish ishlari bilan bog‘liq muammolar ilgari ham kuzatilgan bo‘lib, aholi tomonidan texnik talab va xavfsizlik qoidalariga rioya etilmasligi yuzasidan bir necha bor murojaatlar bildirilgan. Bu esa muammoning tizimli tus olganini ko‘rsatadi.

Holat yuzasidan Oliy Majlis Qonunchilik palatasidagi O‘zbekiston Ekologik partiyasi fraksiyasi a’zosi Botirali Shodiyev tomonidan Tog‘-kon sanoati va geologiya vaziri Bobur Islamov nomiga deputatlik so‘rovi yuborildi.

So‘rovda kon portlatish ishlari ustidan nazorat, xavfsizlik qoidalariga rioya etilishi, fuqarolar mulkiga yetkazilgan zararlarni aniqlash va qoplash, shuningdek, mazkur hududda ishlarni to‘xtatish yoki cheklash masalalari yuzasidan aniq ma’lumot taqdim etish so‘ralgan.

Shuningdek, kelgusida bunday holatlarning oldini olish, kon portlatish ishlarining texnologik jarayonlarini takomillashtirish hamda xavfsizlik choralarini kuchaytirish bo‘yicha ko‘rilayotgan chora-tadbirlar haqida ham asoslantirilgan axborot berilishi talab etilgan.