Andijonda noqonuniy dori ishlab chiqaruvchi yashirin sex fosh etildi

 

Bojxona qo'mita matbuot xizmatining ma’lum qilishicha, Andijon viloyati bojxona boshqarmasining Kontrabandaga qarshi kurashish bo‘limi hamda Davlat xavfsizlik xizmati viloyat boshqarmasi hamkorligida o‘tkazilgan tezkor tadbir davomida noqonuniy laboratoriya aniqlangan.

 

Dastlabki ma’lumotlarga ko‘ra, Andijon shahridagi manzillardan birida faoliyat yuritgan 4 ta yuridik shaxs “oziq-ovqat mahsulotlari uchun kimyoviy qo‘shimchalar” ishlab chiqarish niqobi ostida sifati kafolatlanmagan dori vositalari va biologik faol qo‘shimchalarni noqonuniy ravishda tayyorlab kelgan.

 

                                             

 

Tekshiruv davomida yashirin sexda aholi orasida keng tarqalgan “Vitamix”, “Gegsi”, “Ferrumfer”, “Winds Baby”, “Lyuvit”, “Yodovit”, “Gepporooz”, “Bifidolin” va “Yodoplyus” kabi jami 100 turdagi mahsulot ishlab chiqarilgani aniqlangan.

 

                                         

 

Qayd etilishicha, ushbu mahsulotlar orasida bolalar uchun mo‘ljallangan siroplar, og‘riq qoldiruvchi vositalar, bo‘g‘im va teri kasalliklariga qarshi preparatlar, qon ko‘paytiruvchi vositalar, turli shamchalar hamda maxsus choylar ham mavjud bo‘lgan.

 

Tezkor tadbir davomida manzildan 13 dona ishlab chiqarish uskunasi, 6 dona muhr, mahsulotlarga yaroqlilik muddatini tushirish qurilmalari, 214 ming dona yozuvsiz bo‘sh shisha idish, 78 ming dona bo‘sh kapsula, 503 mingdan ortiq tayyor dori vositalari va biologik qo‘shimchalar hamda 105 kilogramm nomsiz kukun moddalar ashyoviy dalil sifatida olingan.

 

                                           

 

Dastlabki hisob-kitoblarga ko‘ra, musodara qilingan mahsulotlarning umumiy qiymati qariyb 5 milliard so‘mni tashkil etadi.

 

                                           

Hozirda holat yuzasidan bojxona organlari tomonidan tergovga qadar surishtiruv ishlari olib borilmoqda.