Andijon viloyatida bedarak yo‘qolgan o‘smirning jasadi Qoradaryodan topildi
U do‘stlari bilan daryoga cho‘milish uchun borib, suvga cho‘kib ketgan.
Andijon viloyatining Baliqchi tumanida bedarak yo‘qolgan 2009-yilda tug‘ilgan voyaga yetmagan o'smirning jasadi Qoradaryodan topildi. Bu haqda viloyat prokuraturasi xabar berdi.
Ma’lum qilinishicha, 17-may kuni fuqaro Q.M viloyat IIBga murojaat qilib, o‘zining voyaga yetmagan farzandi 16-may kuni uyidan chiqib ketgani va qaytib kelmagani haqida xabar bergan hamda uni qidirishda yordam so‘ragan.
Ushbu murojaat asosida Baliqchi tuman prokuraturasi tomonidan tergovga qadar tekshiruv harakatlari boshlangan.
Dastlabki ma’lumotlarga ko‘ra, 16-may kuni soat 15:30 lar atrofida M.M. do‘stlari bilan birga tuman hududidan oqib o‘tuvchi Qora-daryoga cho‘milish uchun borgan va shu vaqtda suvga cho‘kib ketgan.
Qidiruv ishlari davomida o‘smirning jasadi 20-may kuni Andijon–Namangan yo‘nalishini bog‘lovchi Qoradaryo ko‘prigi yaqinidan topilgan.
Hozirda holat yuzasidan tergovga qadar tekshiruv ishlari davom etmoqda.
Qayd etilishicha, tekshiruv harakatlarini borishi viloyat prokuraturasi tomonidan nazoratga olingan bo‘lib, yakuniga ko‘ra qonuniy qaror qabul qilinishi ta’minlanadi.
“Hurmatli ota-onalar farzandlaringizni qarovsiz qoldirmang, ayniqsa yoz oylarida ruxsat etilmagan suv havzalarida cho‘milishiga yo‘l qo‘ymang, farzandlaringizni nazoratsiz qo‘ymang!”,deyiladi xabarda.
Avvalroq Surxondaryoda 13 yoshli qiz To‘palang daryosiga cho‘kib ketgani haqida xabar berilgandi.
