Bolalar ombudsmani transformatorlar bo‘yicha xavfsizlik nazoratini kuchaytirishni talab qildi
Bolalar ombudsmani tomonidan vakolatli davlat organiga tegishli ta’sir hujjati kiritildi.
Namanganda transformator ustiga chiqqan 13 yoshli bola tok urishi oqibatida vafot etdi. Hodisa ortidan Bolalar ombudsmani elektr obyektlarida xavfsizlik nazoratini kuchaytirishni talab qildi.
Fojia 5-may kuni Namangan viloyatining Davlatobod tumanida yuz bergan. 2013-yilda tug‘ilgan bola gilos uzish maqsadida yuqori kuchlanishli transformator ustiga chiqqan vaqtida elektr toki ta’siriga tushgan. U og‘ir tan jarohati olib, keyinchalik shifoxonada vafot etgan.
Marhumning yaqinlari hodisa sodir bo‘lgan hududda xavfsizlik choralari yetarli darajada ta’minlanmaganini aytmoqda. Ularning ta’kidlashicha, transformator atrofi panjara bilan o‘ralmagan, ayrim elektr simlari ochiq qolgan hamda obyekt qulflanmagan bo‘lgan.
Voqeadan so‘ng Bolalar ombudsmani rasmiy munosabat bildirib, yuqori kuchlanishli elektr qurilmalaridan foydalanishda bolalar xavfsizligini ta’minlash mutasaddi tashkilotlarning bevosita majburiyati ekanini ta’kidladi.
Shuningdek, ombudsman respublika bo‘ylab shu kabi holatlarning oldini olish maqsadida vakolatli idoralarga xavfsizlik standartlari ijrosi ustidan nazoratni kuchaytirish yuzasidan tegishli ta’sir chorasi kiritilganini ma’lum qildi.
Hozirda holat yuzasidan Davlatobod tuman prokuraturasi tomonidan tergovga qadar tekshiruv olib borilmoqda. Tuman elektr ta’minoti korxonasi xodimlari faoliyati yuzasidan esa xizmat tekshiruvi tayinlangan.
