Prezident Shavkat Mirziyoyev muftiy shayx Nuriddin Xoliqnazar bilan telefon orqali muloqot qildi

Prezident Shavkat Mirziyoyev 21-may kuni O‘zbekiston musulmonlari idorasi raisi, muftiy Nuriddin Xoliqnazar bilan telefon orqali muloqot qildi. Bu haqda prezident matbuot xizmati ma’lum qildi.

 

Suhbat Qurbon hayiti arafasida va O‘zbekistonlik hojilar Haj amallarini ado etayotgan kunlarda bo‘lib o‘tdi. Prezident muftiy orqali muqaddas Makka shahrida bo‘lib turgan barcha hojilarni Qurbon hayiti bilan tabriklab, ularning yurt tinchligi, xalq farovonligi hamda yoshlar baxt-saodati yo‘lida qilayotgan duolari ijobat bo‘lishini tiladi.

 

Muloqotda keyingi yillarda Yangi O‘zbekistonda har yili 15 ming nafardan ziyod fuqaro Haj safariga yuborilayotgani qayd etildi. Bu yil esa ilk bor mehnat faxriylari, ularning oila a’zolari, mahalla faollari, nuroniylar hamda kam ta’minlangan oilalar vakillaridan iborat 100 nafar fuqaro davlat hisobidan Haj safariga jo‘natilgani ta’kidlandi.

 

Davlat rahbari hojilarning salomatligi, kayfiyati va ibodatlarni bajarishi uchun yaratilgan sharoitlar bilan qiziqdi. Muftiy Nuriddin Xoliqnazar Makka va Madina shaharlarida ziyoratchilar uchun barcha zarur sharoitlar yaratilgani, tashkiliy ishlar uyushqoqlik bilan olib borilayotganini bildirdi. 

 

Shuningdek, hojilar muqaddas maskanlarda turib mamlakat tinchligi va xalq farovonligi uchun duolar qilayotganini qayd etdi.

 

Suhbat davomida mamlakatda diniy-ma’rifiy sohada amalga oshirilayotgan islohotlarning jamiyat ma’naviyatiga ijobiy ta’sir ko‘rsatayotgani ta’kidlandi. Xususan, Imom Buxoriy majmuasi, Islom sivilizatsiyasi markazi hamda Burhoniddin Marg‘inoniy ilmiy-ma’rifiy va turizm majmuasi kabi maskanlar ajdodlar merosini keng targ‘ib qilishga xizmat qilayotgani aytildi.

 

Xabarga ko‘ra, kuni kecha Qurbon hayitini O‘zbekistonda keng nishonlash bo‘yicha Prezident qarori qabul qilingan. Qarorga ko‘ra, xayriya va muruvvat tadbirlari o‘tkazilib, ehtiyojmand aholini qo‘llab-quvvatlash, 10 mingdan ortiq bolada murakkab jarrohlik amaliyotlarini o‘tkazish hamda 2 mingga yaqin og‘ir kasallikka chalingan fuqarolarni davolash uchun qo‘shimcha mablag‘lar ajratilishi rejalashtirilgan. Masjid va qabristonlarni obod qilish uchun ham alohida resurslar yo‘naltiriladi.

 

Prezident Shavkat Mirziyoyev hojilar yurtga qaytgach, islom ma’rifati va sog‘lom e’tiqodni yoshlar orasida targ‘ib qilish, mahallalarda mehr-oqibat va hamjihatlik muhitini mustahkamlashda namuna bo‘lishiga ishonch bildirdi.

 

Suhbat yakunida davlat rahbari barcha hojilarga salom yo‘llab, ularning ibodatlari qabul bo‘lishini hamda Vatanga sog‘-omon qaytishlarini tiladi.