Bangladeshda qizamiq epidemiyasi: qurbonlar soni 500 nafardan oshdi

Bangladeshda qizamiq oqibatida vafot etganlar soni 500 nafardan oshdi. Bu haqda Reuters xabar berdi.

 

Mamlakat sog‘liqni saqlash mas’ullariga ko‘ra, vafot etganlarning 86 nafarida qizamiq infeksiyasi tasdiqlangan, 426 nafar bolada kasallikka xos alomatlar kuzatilgan.

 

Qayd etilishicha, so‘nggi oylarda kasallik holatlari keskin oshib, shifoxonalar faoliyatiga jiddiy bosim tushirmoqda. Ayniqsa, qishloq hududlari hamda kam ta’minlangan aholi zich yashaydigan shaharlarda vaziyat og‘irlashgan.

 

Bangladesh Sog‘liqni saqlash xizmatlari bosh boshqarmasi ma’lumotlariga ko‘ra, 15 martdan 23 maygacha mamlakat bo‘ylab 62 mingdan ortiq kishida qizamiq alomatlari aniqlangan. Shundan 8,4 mingdan ziyodi laboratoriya orqali tasdiqlangan.

 

Mutaxassislar besh yoshgacha bo‘lgan bolalar eng yuqori xavf ostida ekanini ta’kidlamoqda. Ayniqsa, emlanmagan yoki to‘liq vaksina olmagan bolalarda kasallik og‘ir kechayotgani qayd etilgan.

 

Jahon sog‘liqni saqlash tashkiloti avvalroq muntazam emlash darajasining pasayishi keng ko‘lamli epidemiya xavfini kuchaytirganini bildirgan.

 

Shundan so‘ng Bangladesh hukumati favqulodda qizamiq-qizilcha vaksinatsiyasi kampaniyalarini kengaytirib, tezkor tibbiy guruhlarni safarbar qilgan. Shuningdek, kasallik asoratlarini kamaytirish uchun A vitamini tarqatish hajmi ham oshirilgan.

 

“Qizamiq dunyodagi eng yuqumli kasalliklardan biri bo‘lsa-da, vaksinaning ikki dozasi orqali uning oldini olish mumkin”, deyiladi xabarda.

 

Aprel oyi boshida Bangladesh Sog‘liqni saqlash vazirligi kamida 98 nafar bola qizamiq kasalligi oqibatida vafot etganini ma'lum qilgandi.