IIV Qo‘qondagi 10 yoshli qizning o‘limiga sabab bo‘lgan YTH yuzasidan qo‘shimcha ma’lumot berdi

 

Ichki ishlar vazirligi Qo‘qon shahrida 10 yoshli uch nafar qizaloqni Malibu-2 rusumli avtomobil urib yuborgan yo‘l-transport hodisasi yuzasidan qo‘shimcha tafsilotlarni ma’lum qildi.

 

Ma’lum qilinishicha, hodisa 20-may kuni soat 16:30 lar atrofida Qo‘qon shahrining Amir Temur ko‘chasida sodir bo‘lgan. 9-sinf o‘quvchisi bo‘lgan voyaga yetmagan yigit bobosiga tegishli Malibu-2 avtomobilini yuvish maqsadida olib chiqqan.

 

IIV ma’lumotiga ko‘ra, u avtomobilni bobosining ruxsati bilan olgan. Tajribasiz haydovchi harakat davomida piyodalar o‘tish joyidan kesib o‘tayotgan uch nafar 3-sinf o‘quvchisini urib yuborgan.

 

Yo‘l-transport hodisasi oqibatida qizaloqlardan biri voqea joyida vafot etgan. Yana ikki nafar voyaga yetmagan qiz turli darajadagi og‘ir tan jarohatlari bilan shifoxonaga yotqizilgan. Ulardan biri reanimatsiya bo‘limiga joylashtirilgani bildirilgan.

 

Videoreportajda voyaga yetmagan yigit haydovchilik guvohnomasi bo‘lmaganini ma’lum qilgan. Uning aytishicha, u tengdoshlari bilan aylanish maqsadida avtomobilni boshqargan.

 

Avtomobil egasi bo‘lgan bobosi esa kalitni nevarasiga mashinani yuvib qo‘yish uchun berganini, biroq uning avtomobilni minib ketganidan bexabar bo‘lganini aytgan.

 

Mazkur holat yuzasidan Jinoyat kodeksining 266-moddasi bilan jinoyat ishi qo‘zg‘atilgan. Shuningdek, IIV tomonidan 267-modda — transport vositasini olib qochish holati bo‘yicha ham ish ochilgani ma’lum qilindi.

 

Hozirda voyaga yetmagan haydovchi protsessual tartibda ushlangan bo‘lib, tergov harakatlari davom ettirilmoqda.