Kongoda Ebola qurbonlari soni 200 dan oshdi
Mamlakatda 867 ta gumon qilingan infeksiya holati qayd etilgan.
Kongo Demokratik Respublikasida (KDR) Ebola virusidan vafot etganlar soni 204 kishiga yetdi. Bu haqda mamlakat Aloqa va ommaviy axborot vositalari vazirligi ma’lum qildi.
Rasmiy ma’lumotlarga ko‘ra, mamlakatning sharqiy qismidagi Ituri, Shimoliy Kivu va Janubiy Kivu provinsiyalarida jami 867 ta gumon qilingan infeksiya holati qayd etilgan. Shundan 10 ta o‘lim va 91 ta holat laboratoriya tahlillari orqali tasdiqlangan.
Epidemiyaning asosiy markazi Uganda bilan chegaradosh Ituri provinsiyasi ekani bildirilmoqda. Mutaxassislar virus aholi orasida bir necha hafta avvaldan tarqalgan bo‘lishi mumkinligini istisno qilmayapti.
Jahon sog‘liqni saqlash tashkiloti avvalroq ushbu epidemiya holatini xalqaro miqyosdagi sog‘liqni saqlash favqulodda holati deb e’lon qilgan edi.
Shuningdek, qo‘shni davlatlar — Uganda, Zambiya, Burundi, Tanzaniya va Ruanda tomonidan ham epidemiyaga qarshi kurash choralari kuchaytirilgan. Rossiya tomoni esa epidemiya tarqalishini jilovlashda xalqaro hamkorlik doirasida yordam ko‘rsatishga tayyorligini bildirgan.
