Putin va To‘qayev Rossiya hamda Qozog‘iston do‘stligining asoslarini belgiladi

Rossiya va Qozog‘iston yetakchilari Vladimir Putin hamda Qosim-Jo‘mart To‘qayev ikki davlat xalqlari o‘rtasidagi do‘stlik va yaxshi qo‘shnichilikning yetti asosiy tamoyili haqidagi qo‘shma bayonotni imzoladi. Bu haqda RBK xabar berdi.

 

Putinning Qozog‘istonga tashrifi 27-may kuni boshlangan bo‘lib, 29-maygacha davom etadi. Tashrif Yevrosiyo iqtisodiy ittifoqi (YEOII) sammitiga bag‘ishlangan.

 

28-may kuni Ostona shahrida Rossiya yetakchisini rasmiy kutib olish marosimi bo‘lib o‘tdi. Marosimda Qozog‘iston Prezidenti Qosim-Jomart To‘qayev Vladimir Putinni shaxsan kutib oldi.

 

Rossiya prezidenti yordamchisi Yuriy Ushakovning ma’lum qilishicha, hujjatda ikki tomonlama munosabatlarning asosiy yo‘nalishlari belgilab berilgan. 

 

Jumladan, tamoyillar qatoriga tarixiy mushtaraklik va uni do‘stlik hamda yaxshi qo‘shnichilik ruhida xolis anglash, Yevrosiyo integratsiyasini rivojlantirish, mintaqada hamkorlik, xavfsizlik va muloqot makonini shakllantirish bo‘yicha umumiy sa’y-harakatlar kiritilgan.

 

Shuningdek, umumiy chegara, iqtisodiy sheriklik, til va madaniy xilma-xillikni umumiy boylik sifatida qadrlash, an’anaviy qadriyatlar va sivilizatsion yaqinlik, ta’lim almashinuvi hamda sport sohasidagi hamkorlik, shuningdek “kelajakka umumiy qarash” ham yetti asos qatoridan o‘rin olgan.

 

Muzokaralar davomida Qozog‘iston prezidenti Qosim-Jomart To‘qayev ushbu bayonotning ahamiyatini alohida ta’kidladi:

 

“Bugun qabul qilinayotgan Qozog‘iston va Rossiya xalqlari o‘rtasidagi do‘stlik va yaxshi qo‘shnichilikning yetti tamoyili haqidagi qo‘shma bayonot katta ahamiyatga ega. Ushbu hujjat o‘zaro munosabatlarini aks ettiradi va ularni mustahkam hamda uzoq muddatli asosda chuqurlashtirishga bo‘lgan umumiy salohiyatimizni mustahkamlaydi”, — dedi To‘qayev.

 

Vladimir Putin esa Rossiya va Qozog‘iston o‘rtasidagi aloqalar har tomonlama strategik sheriklik darajasiga chiqqanini bildirgan. Uning ta’kidlashicha, tomonlar iqtisodiyot vа energetikadan tortib madaniy-gumanitar loyihalargacha bo‘lgan barcha yo‘nalishlarni qamrab oluvchi katta hajmdagi hukumatlararo, idoralararo va tijoriy bitimlar paketini tayyorlagan.