Farg‘onada erkak yer talashib odamlarga pichoq bilan tahdid qildi
Bolalar futbol maydonidagi obodonlashtirish ishlari vaqtida yer masalasida kelishmovchilik yuzaga kelgan.
Farg‘ona viloyatining Quva tumanida yer masalasi sabab kelishmovchilik yuzaga kelib, fuqaro pichoq bilan tahdid qilgani ma’lum bo‘ldi. Bu haqda viloyat Ichki ishlar boshqarmasi axborot berdi.
Qayd etilishicha, joriy yilning 22-may kuni Quva tumani “Sultonobod” mahallasida yashovchi fuqaro A.A. yashash hududidagi bolalar futbol maydonida obodonlashtirish ishlarini olib borayotgan mahalladoshlari L.H. hamda H.A. bilan yer maydoni yuzasidan tortishib qolgan.Ma’lum qilinishicha, fuqaro ushbu hududda o‘zining 8 metr haqqi borligini bildirib, janjal chiqargan hamda jamoat joyiga sovuq qurol sifatida foydalanilishi mumkin bo‘lgan pichoq olib kelgan.
Fuqarolarning murojaatidan so‘ng profilaktika inspektorlari voqea joyiga zudlik bilan yetib borib, kelishmovchilikni bartaraf etgan. Shuningdek, fuqaro qo‘lida bo‘lgan pichoq tegishli tartibda rasmiylashtirib olingan. Hodisa davomida hech kim tan jarohati olmagan.
Hozirda mazkur holat yuzasidan fuqaro A.A.ga nisbatan Ma’muriy javobgarlik to‘g‘risidagi kodeksning 183-moddasi (mayda bezorilik) hamda 185-2-moddasi (sovuq qurol yoki sovuq qurol sifatida foydalanilishi mumkin bo‘lgan ashyolarni olib yurish) bilan hujjatlar rasmiylashtirilib, sud organiga yuborilgan.
