Toshkent viloyatida suv nasosi ichidan 1 kgga yaqin sintetik giyohvand modda topildi
Ushbu shaxs internet orqali faoliyat yurituvchi narkodo‘konda “omborchi” vazifasida ishlagan.
Toshkent viloyatining Zangiota tumanida o‘tkazilgan tezkor tadbir davomida suv nasosi qurilmasi ichiga yashirilgan sintetik giyohvandlik moddasi aniqlandi. Bu haqda DXX Zamon.uz’ga xabar berdi.
Davlat xavfsizlik xizmati hamda Bojxona organlari xodimlari hamkorligida o‘tkazilgan tadbirda avvaldan kuzatuvda bo‘lgan, 1994-yilda Qoraqalpog‘istonda tug‘ilgan fuqaro qo‘lga olingan. Undan xorijdan yuborilgan suv nasosi qurilmasi tegishli tartibda olib qo‘yilgan.
Qurilma xolislar ishtirokida tekshirilganda, uning ichiga qariyb 968 gramm “Alfa PVP” sintetik giyohvandlik vositasi yashirilgani ma’lum bo‘lgan.
Shuningdek, tezkor tadbir davomida fuqaroning Toshkent shahri Yangihayot tumanida ijarada yashab kelgan xonadoni ham ko‘zdan kechirilgan. Undan narkotik moddalarni o‘lchash va qadoqlashda foydalanilgan 2 ta elektron tarozi, “zip” paketlar hamda skotchlar topilib, daliliy ashyo sifatida rasmiylashtirib olingan.
Dastlabki ma’lumotlarga ko‘ra, ushbu shaxs internet orqali faoliyat yurituvchi narkodo‘konda “omborchi” vazifasida ishlagan.
Mazkur holat yuzasidan jinoyat ishi qo‘zg‘atilib, tergov harakatlari davom ettirilmoqda.
