Navoiyda pora olishdan bosh tortgan YPX xodimiga 1000 dollar mukofot berildi
Mast holda avtomobil boshqargan haydovchining otasi IIO xodimiga ma’muriy materiallarni sudga yubormaslik uchun pora taklif qilgan.
Navoiy viloyatida xizmat vazifasini halol bajargan yo‘l-patrul xizmati xodimi pul mukofoti bilan rag‘batlantirildi. Bu haqda Ichki ishlar vazirligi ma’lum qildi.
Qayd etilishicha, 2026-yil 7-aprel kuni Karmana tumanida xizmat olib borayotgan YPX xodimlari Samarqand–Navoiy yo‘nalishida harakatlanayotgan Lacetti avtomobilini to‘xtatib, tekshiruv o‘tkazgan. Natijada haydovchi transport vositasini mast holda boshqarayotgani aniqlangan.
Shundan so‘ng qoidabuzarlik bo‘yicha tegishli hujjatlar rasmiylashtirilgan va avtomobil jarima maydonchasiga joylashtirilgan.
Ma’lum qilinishicha, ertasi kuni haydovchi otasi bilan YPX xodimlari huzuriga kelgan. Fuqaro ma’muriy materiallarni sudga yubormaslik hamda avtomobilni jarima maydonchasidan chiqarib berish evaziga inspektorga 1000 dollar pora taklif qilgan.
Xodim ushbu holat haqida ichki ishlar organlariga xabar bergan. O‘tkazilgan tezkor tadbir davomida fuqaro YPX inspektoriga taklif qilingan porani berishga uringan vaqtida qo‘lga olingan.
Holat yuzasidan Jinoyat kodeksining 211-moddasi bilan jinoyat ishi qo‘zg‘atilgan. Hozirda tergov harakatlari davom etmoqda.
Ichki ishlar vazirligi ma’lumotiga ko‘ra, pora olishdan bosh tortgan kapitan Sherbek Turxonov davlat tomonidan bazaviy hisoblash miqdorining 30 baravari, ya’ni 12 million 360 ming so‘m miqdoridagi pul mukofoti bilan taqdirlangan.
Avvalroq Toshkent shahrida Favqulodda vaziyatlar vazirligi xodimiga 30 ming dollar pora taklif qilgan tadbirkor qamoqqa olingani haqida xabar berilgandi.
