Surxondaryoda mast holda tez yordam mashinasini boshqargan haydovchi 16 mln so‘m jarimaga tortildi
Shuningdek, u 3 yil muddatga transport vositalarini boshqarish huquqidan mahrum etildi.
Surxondaryo viloyati Angor tumanida tez yordam xizmatida ishlovchi haydovchining mast holda xizmat avtomobilini boshqargani aniqlanib, unga nisbatan sud qarori chiqarildi. Bu haqda Surxondaryo IIB xabar berdi.
Ma’lum qilinishicha, tuman tibbiyot birlashmasida haydovchi bo‘lib ishlagan 62 yoshli fuqaro 14-may kuni soat 21:10 atrofida o‘ziga biriktirilgan Damas rusumli xizmat avtomobilini spirtli ichimlik ta’sirida boshqargan.
O‘tkazilgan tekshiruvda haydovchi alkotester yordamida ko‘rikdan o‘tkazilgan. Natijada uning organizmida 0,755 mg/l miqdorida alkogol borligi aniqlangan.
Holat yuzasidan Ma’muriy javobgarlik to‘g‘risidagi kodeksning 131-moddasi asosida bayonnoma rasmiylashtirilib, ish sudga yuborilgan.
Jinoyat ishlari bo‘yicha Angor tuman sudi haydovchini aybdor deb topdi. Sud qaroriga ko‘ra, u 3 yil muddatga transport vositalarini boshqarish huquqidan mahrum etildi hamda bazaviy hisoblash miqdorining 40 baravari — 16 million 480 ming so‘m miqdorida jarimaga tortildi.
