Toshkentda o‘qituvchi talaba va uning tanishini o‘ldirdi
O‘qituvchi rashk sabab 2004-yilda tug‘ilgan talaba qiz va uning tanishi bo‘lgan 1975-yilda tug‘ilgan Xitoy Xalq Respublikasi fuqarosini pichoqlagani aytilmoqda.
Toshkent shahrining Sergeli tumanida 1998-yilda tug‘ilgan o‘qituvchi tomonidan sodir etilgan qotillik oqibatida ikki kishi vafot etdi. Bu haqda Zamon.uz’ga Bosh prokuratura matbuot xizmati rahbari Hayot Shamsutdinov ma’lumot berdi.
Ma’lum qilinishicha, joriy yil 21-may kuni Toshkent davlat jahon tillari universitetida o‘rindoshlik asosida ishlovchi 1998-yilda tug‘ilgan erkak rashk sababli 2004-yilda tug‘ilgan talaba qiz va uning tanishi bo‘lgan 1975-yilda tug‘ilgan Xitoy Xalq Respublikasi fuqarosiga pichoq bilan hujum qilgan.
Hodisa oqibatida Xitoy fuqarosi voqea joyida vafot etgan, talaba qiz esa og‘ir jarohatlar bilan shifoxonaga yotqizilib, 23-may kuni vafot etgan. Talaba qiz universitetning talabalar turar joyida yashagan.
Holat yuzasidan Sergeli tuman prokuraturasi tomonidan Jinoyat kodeksining 97-moddasi 2-qismi (qasddan odam o‘ldirish) bilan jinoyat ishi qo‘zg‘atilgan va tergov harakatlari davom etmoqda.
