Farg'onada chaqaloqning o'lik tug'ilishi yuzasidan xizmat tekshiruvi boshlandi
Tibbiy xulosaga ko‘ra, homiladorlik 38 haftalik bo‘lgan.
Farg'ona viloyati Uchko‘prik tumanida chaqaloq o‘limi bilan bog‘liq holat yuzasidan xizmat tekshiruvi tayinlandi. Bu haqda tuman tibbiyot birlashmasi rasmiy izoh berdi.
Ma’lum qilinishicha, 2026-yil 30-may kuni soat 00:00 da Olmurod MFYda yashovchi, 2000-yilda tug‘ilgan M.N. tug‘ruq og‘riqlari va qog‘anoq suvlari ketishi shikoyati bilan tuman tug‘ruqxonasiga murojaat qilgan. 31-may kuni soat 08:40 da bemor o‘lik chaqaloqni dunyoga keltirgan.
Tibbiy xulosaga ko‘ra, homiladorlik 38 haftalik bo‘lib, bu ikkinchi tug‘ruq holati hisoblanadi. Chaqaloq chanoq bilan, oyoq qismi orqali kelgan, jinsi qiz, vazni 3300 gramm, bo‘yi 50 santimetrni tashkil etgan.
Sog‘liqni saqlash vazirligining amaldagi klinik protokollariga muvofiq, ayrim holatlarda kesarcha kesish amaliyoti tavsiya etiladi. Biroq mazkur vaziyatda bemorning ikkinchi tug‘ruq holati ekani hamda homila vazni taxminan 3100 gramm atrofida baholanganligi sababli tabiiy tug‘ruq yo‘li tanlanganligi bildirilgan.
Tug‘ruq jarayonida chaqaloqning oyoq qismi chiqqanidan so‘ng, yelka va bosh qismini chiqarishda tibbiy amaliyotlarda qo‘llaniladigan Lovset hamda Morisau–Smelli–Veyt usullari qo‘llangan. Biroq texnik murakkabliklar sabab chaqaloqning bosh qismini chiqarish qiyinlashgan va chaqaloq o‘lik holda tug‘ilgan.
Bildirilishicha, ko‘rsatilgan reanimatsion choralar natija bermagan.
Hozirda barcha tibbiy jarayonlar belgilangan klinik protokollar asosida amalga oshirilganligi yuzasidan xizmat tekshiruvi davom etmoqda.
