Shavkat Mirziyoyev va Vladimir Putin Jizzaxdagi AES qurilishini boshlab beradi
Jizzax viloyatida katta quvvatli ikkita hamda har biri 55 megavatt quvvatga ega ikkita kichik energoblokdan iborat AES barpo etiladi.
O‘zbekiston prezidenti Shavkat Mirziyoyev va Rossiya prezidenti Vladimir Putin 4-iyun kuni Sankt-Peterburgda bo‘lib o‘tadigan uchrashuv doirasida videokonferensiya orqali Jizzax viloyatida atom elektr stansiyasi (AES) qurilishi boshlanishi marosimida ishtirok etadi. Bu haqda RIA Novosti Rossiya prezidenti yordamchisi Yuriy Ushakovga tayanib, xabar berdi.
Ushakovning so‘zlariga ko‘ra, Shavkat Mirziyoyev Sankt-Peterburg xalqaro iqtisodiy forumining xorijiy mehmonlaridan biri sifatida qatnashadi. Shu munosabat bilan ikki davlat rahbarlari o‘rtasida 4-iyun kuni kechqurun Konstantin saroyida ikki tomonlama uchrashuv ham bo‘lib o‘tadi.
Ushakov muzokaralar O‘zbekistonda qurilishi rejalashtirilgan integratsiyalashgan atom elektr stansiyasining birinchi energobloki qurilishiga start berish marosimi bilan boshlanishini bildirdi.
Ma’lum qilinishicha, loyiha doirasida Jizzax viloyatida katta quvvatli ikkita hamda har biri 55 megavatt quvvatga ega ikkita kichik energoblokdan iborat AES barpo etiladi.
Marosimda Atom energiyasi bo‘yicha xalqaro agentlik (MAGATE) bosh direktori Rafael Grossi, “Rosatom” rahbari Aleksey Lixachyov va “O‘zatom” agentligi direktori Azim Axmedxodjayev ham ishtirok etishi kutilmoqda.
Tadbir davomida loyiha bo‘yicha texnik tayyorgarlik yuzasidan hisobotlar tinglanadi va shundan so‘ng Rossiya hamda O‘zbekiston prezidentlari qurilish ishlarini rasman boshlashga ruxsat beradi.
Sankt-Peterburg xalqaro iqtisodiy forumi joriy yil 3–6-iyun kunlari bo‘lib o‘tadi.
