Farg‘onada voyaga yetmagan qiz o‘zini kanalga tashladi
Joniga qasd qilish maqsadida ko‘prikdan suvga o‘zini tashlagan qiz qutqarib qolindi.
Farg‘ona viloyatining Buvayda tumanida ekologiya inspektorlari voyaga yetmagan qizning hayotini saqlab qolishdi. Bu haqda viloyat Ekologiya va iqlim o‘zgarishi bosh boshqarmasi matbuot xizmati ma’lum qildi.
Qayd etilishicha, tuman Ekologiya bo‘limi inspektorlari navbatdagi reyd tadbirini o‘tkazayotgan vaqtda hududdan oqib o‘tuvchi Achchiqko‘l kanali ustidagi ko‘prikdan voyaga yetmagan qizning suvga sakraganini payqab qolgan.
Taxminan 200 metr masofada bo‘lgan inspektorlar zudlik bilan voqea joyiga yetib borib, tezkor harakatlari natijasida qizni suvdan olib chiqishga muvaffaq bo‘lgan. Shunday qilib, uning hayoti saqlab qolingan.
Hodisadan so‘ng qizga birinchi tibbiy yordam ko‘rsatilib, tegishli xizmatlar hamda uning yaqinlariga xabar berilgan.
