Hanter Bayden yaxshi natijalarga erisha oladi — Tramp

 

AQSH prezidenti Donald Tramp sobiq prezident Jo Baydenning o‘g‘li Hanter Baydenning kelajakdagi prezidentlik saylovlarida Demokratlar partiyasidan munosib nomzod bo‘lishi mumkinligini ta’kidlagan deb xabar beradi Ria novosti.

 

Oq uyda jurnalistlar bilan muloqot chog‘ida Hanter Baydenning siyosiy istiqbollari haqida savolga javob bergan Tramp: “Menimcha, Hanter yaxshi natijalarga erisha oladi”, degan.

 

Trampning ushbu bayonoti Demokratlar partiyasida 2028-yilgi prezidentlik saylovlari uchun ehtimoliy nomzodlar atrofidagi muhokamalar kuchayib borayotgan bir paytda yangragan. AQSH rahbari Hanter Baydenning nomzod sifatidagi imkoniyatlariga ijobiy baho berar ekan, partiya ichidagi boshqa da’vogarlar ham ma’lum darajada qo‘llab-quvvatlanayotganini qayd etgan.

 

Avvalroq Hanter Bayden ham siyosiy faoliyatini davom ettirishi mumkinligiga ishora qilgandi. Xususan, amaldagi vitse-prezident Jey Di Vens bilan ehtimoliy siyosiy raqobat haqida so‘ralganda, u “Ketdik”, deya javob qaytargan.

 

So‘nggi intervyularidan birida Hanter Bayden o‘tmishda giyohvandlik bilan bog‘liq jiddiy muammolarni boshdan kechirganini tan olib, 2019-yildan buyon yaxshi hayot kechirayotganini ma’lum qilgan. U AQSH tarixida amaldagi prezidentning jinoiy ayblovlarga duch kelgan ilk farzandi sifatida ham tilga olinadi.

 

Jo Bayden prezidentlik vakolatlari yakunlanishi arafasida o‘g‘li Hanter Baydenni afv etish to‘g‘risidagi qarorni imzolagan. Mazkur qaror AQSH siyosiy doiralari va jamoatchiligi orasida keng muhokamalarga sabab bo‘lgan.

 

Siyosiy kuzatuvchilar fikricha, agar Hanter Bayden kelajakdagi prezidentlik poygasida ishtirok etishga qaror qilsa, uning nomzodi Demokratlar partiyasi ichidagi eng ko‘p e’tibor qaratiladigan va bahs-munozaralarga sabab bo‘ladigan nomzodlardan biriga aylanishi mumkin.

 

Eslatib o‘tamiz, avvalroq Hanter Baydenning qarzlari tufayli AQSHni tark etgani xabar qilingan edi.