Shavkat Mirziyoyev va Vladimir Putin O‘zbekistonda AES qurilishiga start berdi
Qurilish ishlari xalqaro standartlar va XAEA nazorati ostida amalga oshirilmoqda.
Shavkat Mirziyoyev va Vladimir Putin Oʻzbekistonda integratsiyalashgan atom elektr stansiyasining birinchi energiya blokini qurish ishlarini rasman boshlab berdilar. Bu haqda Prezident matbuot xizmati xabar berdi.
Marosimda telekoʻprik orqali Xalqaro atom energiyasi agentligi (XAEA) bosh direktori Rafael Grossi ham ishtirok etdi.
Oʻzbekiston rahbari loyiha amalga oshirilishini qoʻllab-quvvatlagani uchun Rossiya prezidenti hamda XAEA bosh direktori Rafael Grossiga minnatdorlik bildirdi. Shuningdek, mamlakatimizda ilk atom elektr stansiyasini barpo etishda ishtirok etayotgan Oʻzbekiston va Rossiya mutaxassislarining fidokorona mehnati va yuksak malakasiga alohida eʼtirof etildi.
Qayd etilishicha, mazkur loyiha Oʻzbekistonning texnologik, sanoat va ilmiy rivojlanishida muhim bosqich boʻlib, mamlakatda atom energetikasi sohasini shakllantirish uchun mustahkam asos yaratadi. Loyiha kichik modulli atom generatsiyasi hamda yirik energetika yoʻnalishidagi eng ilgʻor texnologiyalarni oʻzida mujassam etgan.
Shavkat Mirziyoyev atom energetikasi sohasida xavfsizlik masalasi ustuvor ahamiyatga ega ekanini taʼkidlab, stansiyani qurish va foydalanishga topshirish ishlari eng yuqori xalqaro standartlar asosida hamda XAEAning doimiy nazorati ostida amalga oshirilayotganini qayd etdi.
Taʼkidlanishicha, ushbu strategik loyiha Oʻzbekiston va Rossiya oʻrtasidagi keng qamrovli strategik sheriklik hamda ittifoqchilik munosabatlarini yanada mustahkamlashga xizmat qiladi.
