Afrikadagi Ebola epidemiyasi so‘nggi 50 yildagi eng yirik o‘choqlardan biriga aylandi
Kongo va Ugandada Ebola bilan kasallanishning 397 ta holati tasdiqlangan, virus oqibatida 63 kishi vafot etgan.
Afrika Kasalliklarni nazorat qilish va oldini olish markazi (Africa CDC) Kongo Demokratik Respublikasi hamda Ugandada davom etayotgan Ebola epidemiyasi 1976-yildan buyon qayd etilgan to‘rtinchi eng yirik kasallik tarqalishi ekanini ma’lum qildi.
Tashkilot mutaxassislarining ta’kidlashicha, kasallanish va o‘lim ko‘rsatkichlari bo‘yicha ushbu epidemiya tarixdagi eng yirik Ebola o‘choqlari qatoridan joy olgan. Africa CDC vaziyatni “o‘ta jiddiy” deb baholamoqda.
So‘nggi ma’lumotlarga ko‘ra, ikki mamlakatda Ebola virusi bilan kasallanishning 397 ta holati tasdiqlangan. Kasallik oqibatida kamida 63 kishi vafot etgan.
Epidemiyaning tarqalish zanjirini aniqlash maqsadida sog‘liqni saqlash xizmatlari tomonidan qariyb 10 ming nafar kontakt shaxs nazoratga olingan. Shundan 4341 nafari Kongo Demokratik Respublikasida, 5009 nafari esa Ugandada qayd etilgan.
Mutaxassislar epidemiyaning asosiy sababi sifatida Bundibugyo shtammi tarqalayotganini qayd etmoqda. Ushbu shtammga qarshi hozircha tasdiqlangan vaksina yoki maxsus davolash usuli mavjud emas.
Shu sababli bemorlarni izolyatsiya qilish, organizm suyuqliklarini tiklash, simptomatik davolash hamda og‘riqni kamaytirishga qaratilgan palliativ yordam asosiy choralar sifatida qo‘llanmoqda.
Africa CDC ma’lumotlariga ko‘ra, maxsus terapiyaning mavjud emasligi epidemiyaga qarshi kurashni murakkablashtirmoqda va o‘lim holatlarini kamaytirishda tibbiy kuzatuv hamda qo‘llab-quvvatlovchi davolash muhim ahamiyat kasb etmoqda.
