AQSh va Eron yana bir-biriga zarba berdi
Eron AQSh harakatlariga javoban mintaqadagi “dushman bazalari”ga raketa hujumi uyushtirganini bildirdi.
AQSh va Eron o‘rtasida Fors ko‘rfazi mintaqasidagi vaziyat yana keskinlashdi. Tomonlar o‘rtasida amalda bo‘lgan sulhga qaramay, har ikki davlat bir-birining harbiy obyektlariga zarbalar bergani haqida xabarlar tarqaldi.
AQSh Markaziy qo‘mondonligi (CENTCOM) ma’lumotiga ko‘ra, Eron tomonidan Quvayt va Bahrayn yo‘nalishida uchirilgan yettita ballistik raketadan oltitasi havo hujumidan mudofaa tizimlari tomonidan yo‘q qilingan, yana biri esa nishonga yetib bormagan.
Bundan avval AQSh harbiylari Hormuz bo‘g‘ozi hududida harakatlangan to‘rtta Eron dronini tutib qolganini ma’lum qilgan. Shundan so‘ng AQSh kuchlari Eronning Qeshm oroli va Goruk hududlaridagi qirg‘oq kuzatuv radar obyektlariga zarba bergan.
Quvayt va Bahraynda havo hujumi sirenalarning yangragani hamda portlashlar eshitilgani haqida xabarlar tarqaldi. Quvayt harbiylari raketa va dron hujumlari qaytarilganini ma’lum qilgan.
O‘z navbatida, Eron Islom inqilobi qo‘riqchilari korpusi AQShning Eron hududlariga bergan zarbalariga javoban mintaqadagi “dushman bazalari”ga raketa hujumlari uyushtirilganini bildirdi.
CENTCOM esa hujumlar oqibatida amerikalik harbiylar orasida qurbonlar qayd etilmaganini, Bahrayndagi AQShning 5-floti bazasiga zarar yetkazilgani haqidagi da’volar haqiqatga to‘g‘ri kelmasligini ta’kidlagan.
Bahrayn Tashqi ishlar vazirligi Eronning raketa hujumlarini qoralab, buni mintaqa davlatlari suverenitetiga qarshi harakat sifatida baholagan.
Tahlilchilarga ko‘ra, yangi keskinlik dunyoning muhim energetika yo‘laklaridan biri hisoblangan Hormuz bo‘g‘ozidagi xavfsizlik va xalqaro energiya bozorlaridagi barqarorlikka salbiy ta’sir ko‘rsatishi mumkin.
