AQSHdagi o‘zbekistonliklar qonunlarga rioya qilishga chaqirildi
Nyu-Yorkdagi Bosh konsullik so‘nggi vaqtlarda O‘zbekiston fuqarolari ishtirokidagi huquqbuzarliklar haqidagi xabarlar OAV va ijtimoiy tarmoqlarda ko‘payganini ta’kidladi.
O‘zbekistonning Nyu-York shahridagi Bosh konsulligi AQSHda istiqomat qilayotgan va faoliyat yuritayotgan vatandoshlarga murojaat yo‘llab, mahalliy qonunlarga qat’iy amal qilish hamda jamoat tartibi va xulq-atvor me’yorlarini hurmat qilish zarurligini eslatdi.
Qayd etilishicha, so‘nggi paytlarda ayrim O‘zbekiston fuqarolari ishtirokidagi qonunbuzarlik holatlari ommaviy axborot vositalari va ijtimoiy tarmoqlarda keng yoritilmoqda. Konsullik bunday holatlar avvalo shaxsiy javobgarlikka sabab bo‘lishi, shu bilan birga, butun o‘zbek diasporasining obro‘siga salbiy ta’sir ko‘rsatishi mumkinligini ta’kidlagan.
Diplomatik vakolatxona AQSHda yashayotgan aksariyat vatandoshlar halol mehnat qilayotgani, ta’lim olayotgani, tadbirkorlik bilan shug‘ullanayotgani hamda O‘zbekistonning ijobiy qiyofasini munosib namoyon etayotganini qayd etgan.
Shuningdek, yirik xalqaro tadbirlar va sport musobaqalari davrida O‘zbekiston va uning fuqarolariga nisbatan jamoatchilik hamda OAV e’tibori yanada ortishi sababli fuqarolarning xatti-harakatlari alohida ahamiyat kasb etishi ta’kidlangan.
Bosh konsullik zarur hollarda huquqiy va konsullik yordamini ko‘rsatishga tayyor ekanini bildirar ekan, vatandoshlarni mas’uliyatli bo‘lishga, mahalliy qonunchilik talablariga rioya etishga hamda O‘zbekistonning xalqaro nufuziga putur yetkazishi mumkin bo‘lgan har qanday harakatlardan tiyilishga chaqirgan.
Eslatib o'tamiz, avvalroq AQSHda 4,5 million dollarlik tovarlarni o‘g‘irlashda gumonlangan, noqonuniy poyga uyushtirgan o‘zbekistonliklar qo‘lga olingani haqida xabar berilgan edi.
