Olti yildan buyon qidiruvda bo‘lgan ayol Turkiyada qo‘lga olinib, O‘zbekistonga qaytarildi
U firibgarlik yo‘li bilan fuqarolarning katta miqdordagi mablag‘larini qo‘lga kiritganlikda gumon qilinmoqda.
2020-yildan buyon qidiruvda bo‘lgan firibgarlikda gumonlanuvchi ayol Turkiyada qo‘lga olinib, O‘zbekistonga ekstraditsiya qilindi. Bu haqda Ichki ishlar vazirligi ma’lum qildi.
Qayd etilishicha, O‘zbekiston va Turkiya huquqni muhofaza qiluvchi organlari o‘rtasidagi hamkorlik doirasida olib borilgan tezkor-qidiruv tadbirlari natijasida qidiruvdagi shaxsning yashash joyi aniqlangan va u qo‘lga olingan.
Tergov ma’lumotlariga ko‘ra, ayol Jinoyat kodeksining 168-moddasi 3-qismida nazarda tutilgan firibgarlik jinoyatini sodir etganlikda gumon qilinmoqda. U o‘zi tashkil etgan MCHJ orqali xorijiy davlatlarga ishga yuborish uchun zarur litsenziyaga ega bo‘lmagan holda fuqarolarni AQSH va Yevropa mamlakatlariga yuqori maoshli ishga joylashtirishni va’da qilgan.
Shuningdek, fuqarolar bilan turli xizmatlar ko‘rsatish bo‘yicha shartnomalar tuzib, ularning ishonchiga kirgan holda katta miqdordagi mablag‘larni qo‘lga kiritgani va ushbu mablag‘larni shaxsiy ehtiyojlariga sarflagani aytilmoqda.
IIV Tezkor-qidiruv departamenti hamda Turkiya Respublikasi Ichki ishlar vazirligi bilan hamkorlikda o‘tkazilgan tadbirlar natijasida qidiruvdagi shaxs Turkiyada aniqlanib, qo‘lga olingan va O‘zbekistonga qaytarilgan.
