Samarqandda 14 yoshli qizni bosib ketgan haydovchi 6-yilga qamaldi
Sudlanuvchidan marhumaning oilasiga 140 million so‘m moddiy va ma’naviy zarar undirilishi belgilandi.
Samarqand shahrida 14 yoshli qizning o‘limi bilan bog‘liq yo‘l-transport hodisasi bo‘yicha sud hukmi e’lon qilindi. Bu haqda “Zamon” dasturida ma’lum qilindi.
Ma’lumotlarga ko‘ra, hodisa joriy yilning 10-fevral kuni soat 14:15 atrofida Samarqand shahridagi Temiryo‘lchilar mahallasida sodir bo‘lgan. Voyaga yetmagan qiz ukasi bilan velosiped uchish uchun mahalla ichki yo‘liga chiqqan.
Qayd etilishicha, qiz velosiped boshqaruvini yo‘qotib, yo‘l chetida to‘xtab turgan avtomobilga urilgan va qatnov qismiga yiqilgan. Shundan so‘ng shu yo‘nalishda harakatlanib kelayotgan yuk mashinasi uni bosib ketgan. Oqibatda qiz og‘ir tan jarohatlari tufayli voqea joyida vafot etgan.
Mazkur jinoyat ishi Samarqand shahar jinoyat ishlari bo‘yicha sudida ko‘rib chiqilgan. Sud tergovi davomida 26 yoshli haydovchi avval ham yo‘l harakati qoidalarini buzish bilan bog‘liq jinoyat uchun javobgarlikka tortilgani aniqlangan.
Shuningdek, hodisa sodir bo‘lgan hududda yuk avtomobillari harakati taqiqlangan bo‘lishiga qaramay, haydovchi ushbu yo‘ldan foydalangani ma’lum bo‘lgan. Sudda e’lon qilingan xulosaga ko‘ra, haydovchida transport vositasini to‘xtatib qolish uchun texnik imkoniyat mavjud bo‘lgan.
Sud hukmiga binoan, haydovchi Jinoyat kodeksining 266-moddasi 2-qismi — transport vositalari harakati yoki ulardan foydalanish xavfsizligi qoidalarini buzib, odam o‘limiga sabab bo‘lishda aybdor deb topilgan.
Unga 6 yil muddatga ozodlikdan mahrum qilish hamda 3 yil davomida transport vositalarini boshqarish huquqidan mahrum etish jazosi tayinlandi.
Bundan tashqari, sud qarori bilan sudlanuvchidan jabrlanuvchi tomon foydasiga 20 million so‘m moddiy va 120 million so‘m ma’naviy zarar undirilishi belgilandi.
