Eron Isroilni yanada kuchli zarbalar bilan ogohlantirdi
Tehron Isroilning Livandagi amaliyotlari davom etsa, javob hujumlari yanada keskin va halokatli bo‘lishini ma’lum qildi.
Eron Qurolli Kuchlari Markaziy shtabi (“Xatam al-Anbiya”) rahbari Ali Abdullohiy Isroilni Janubiy Livanga uyushtirilayotgan hujumlarni to‘xtatishga chaqirdi. Unga ko‘ra, agar harbiy amaliyotlar kengaytirilsa yoki Eronga qarshi harakatlar davom ettirilsa, Tehron tomonidan yanada kuchli va halokatli javob zarbalari berilishi mumkin. Bu haqda ISNA axborot agentligi xabar berdi.
Abdullohiyning ta’kidlashicha, Isroilning Janubiy Livan hamda Bayrutning Dahiya hududiga qaratilgan hujumlari mintaqadagi vaziyatni yanada keskinlashtirmoqda. Eron tomoni bunday harakatlar davom etgan taqdirda nafaqat Isroilga, balki uning mintaqadagi ittifoqchilariga qarshi ham javob choralarini ko‘rishi mumkinligini bildirgan.
Avvalroq Isroil armiyasi Eron hududidan raketa uchirilgani aniqlanganini ma’lum qilgan edi. Shu munosabat bilan mamlakat shimolidagi qator hududlarda, jumladan Hayfa atrofida havo hujumi xavfi sabab ogohlantiruvchi sirenalar ishga tushirilgan.
