Rossiyada Putinni himoya qiluvchi maxsus kamera tizimi vaqtincha o‘chirib qo‘yildi — Financial Times
Bunday ehtiyot choralariga Isroil razvedkasining Eron hududidagi videokuzatuv tizimlaridan foydalangani haqidagi ma’lumotlar sabab bo‘lgan.
Rossiya xavfsizlik xizmatlari Vladimir Putin va uning eng yaqin atrofidagi mansabdor shaxslarni himoya qilish uchun mo‘ljallangan maxsus videokuzatuv tizimining bir qismini vaqtincha o‘chirib qo‘ygan. Bu haqda Financial Times nashri vaziyatdan xabardor ikki manbaga tayanib xabar berdi.
Nashr ma’lumotlariga ko‘ra, mazkur voqea Tehronda Eron oliy rahbari Oyatulloh Ali Xomanaiyning o'ldirilganidan keyin sodir bo'lgan. Rossiya maxsus xizmatlari zamonaviy kuzatuv tizimlari va videokameralar orqali yuqori martabali shaxslarning joylashuvi aniqlanishi mumkinligidan xavotir bildirgan.
Manbalardan birining aytishicha, ushbu maxsus tizim Moskva bo‘ylab ishlayotgan qariyb 300 mingta kuzatuv kamerasidan alohida faoliyat yuritadi. Xavfsizlik nuqtai nazaridan tizim internet tarmog‘idan uzilib, qo‘shimcha tekshiruv va auditdan o‘tkazilgan. Tekshiruvlar yakunlangach, kameralar qayta ishga tushirilgan.
Financial Times yozishicha, bunday ehtiyot choralariga Isroil razvedkasining Eron hududidagi videokuzatuv tizimlaridan foydalangani haqidagi ma’lumotlar sabab bo‘lgan. Xabarda aytilishicha, Isroil maxsus xizmatlari yuqori martabali shaxslarning harakatlanishi va joylashuvini aniqlash uchun yo‘l kameralaridan olingan katta hajmdagi videoyozuvlardan foydalangan.
Rossiya prezidenti matbuot kotibi Dmitriy Peskov Financial Times’ning ushbu masala bo‘yicha savollariga javob bermagan. Biroq Federal xavfsizlik xizmati (FSB) direktori Aleksandr Bortnikov avvalroq mintaqaviy xavfsizlik organlari rahbarlarini zamonaviy videokuzatuv tizimlarining ehtimoliy zaifliklari haqida ogohlantirgani qayd etilgan.
Uning ta’kidlashicha, sun’iy intellekt va zamonaviy tahlil texnologiyalari yordamida videoyozuvlardan shaxslarning harakati, uchrashuvlari va marshrutlarini aniqlash imkoniyatlari keskin kengaygan. Bu esa xavfsizlik tizimlarini yangi tahdidlarga duchor qilmoqda.
Shu bilan birga, Financial Times bilan suhbatlashgan ukrainalik mustaqil xakerlardan biri Moskva va Kreml atrofidagi ayrim kuzatuv kameralari hanuz faol ishlayotganini hamda ularga muntazam ravishda kiberhujumlar uyushtirilayotganini da’vo qilgan.
Nashrning qayd etishicha, zamonaviy videoanalitika texnologiyalari videoyozuvlar bazasida matnli qidiruvni amalga oshirish imkonini beradi. Masalan, tizim orqali “ikki kishi sumka almashmoqda” yoki “qisqa vaqt ichida bir hududdan bir necha bor o‘tgan avtomobil” kabi so‘rovlar bo‘yicha qidiruv o‘tkazish mumkin.
Mutaxassislar fikricha, bunday texnologiyalar xavfsizlik va razvedka sohasida yangi imkoniyatlar yaratishi bilan birga, davlat rahbarlari va strategik ahamiyatga ega shaxslarning xavfsizligini ta’minlash masalasini ham yanada murakkablashtirmoqda.
