“Ehtiyot bo‘l, aks holda Eron bilan yolg‘iz qolasiz” — Tramp Netanyaxuni ogohlantirdi
AQSh prezidenti navbatdagi hujumlar sodir bo‘lsa, Vashington Tel-Avivni qo‘llab-quvvatlash masalasini qayta ko‘rib chiqishi mumkinligini bildirdi.
AQSh prezidenti Donald Tramp Isroil bosh vaziri Benjamin Netanyaxuni Eron bilan bog‘liq harbiy harakatlarda ehtiyotkor bo‘lishga chaqirdi hamda zarurat tug‘ilganda Vashington Tel-Avivni qo‘llab-quvvatlash masalasini qayta ko‘rib chiqishi mumkinligini bildirgan.
CNN'ga bergan intervyusida Tramp Netanyaxuga: “Harakatlaringda juda ehtiyot bo‘lishing kerak. Chunki juda tez orada Eron bilan yolg‘iz qolib ketishing mumkin”, deganini ma’lum qilgan.
AQSh prezidentining aytishicha, Vashington va Tehron o‘rtasidagi muzokaralarda vositachilik qilayotgan besh davlat Isroil rahbariyatiga bosim o‘tkazish bo‘yicha undan yordam so‘ragan.
Tramp, shuningdek, Isroil tomonidan Eron hududiga uyushtirilgan ayrim harbiy amaliyotlar haqida AQSh tomoniga kech xabar berilganini ta’kidlagan.
“Isroilliklar bizga yangilangan ma’lumotlarni juda kech yetkazishdi. Ular allaqachon Eron tomon yo‘l olgan edi. Men hujum ko‘lamini qisqartirishga muvaffaq bo‘ldim”, degan AQSh prezidenti.
Avvalroq Eron Isroil Mudofaa kuchlarining Bayrut chekkasiga uyushtirgan hujumidan so‘ng Isroil hududiga raketa zarbalari bergani haqida xabarlar berilgan edi.
