Kongoda Ebola qurbonlari soni 100 nafardan oshdi

 

Kongo Demokratik Respublikasida Ebola virusi tarqalishi davom etmoqda. Mamlakat Sog‘liqni saqlash vazirligi ma’lumotlariga ko‘ra, laboratoriya tomonidan tasdiqlangan o‘lim holatlari soni 101 nafarga yetgan deb xabar bermoqda TASS mamlakat Sog'liqni saqlash vazirligiga tayanib.

 

Qayd etilishicha, joriy epidemiya davrida virusni yuqtirganlar soni 550 kishini tashkil etmoqda. Bir kun avval ushbu ko‘rsatkichlar mos ravishda 91 nafar vafot etgan va 515 nafar kasallangan bemorni tashkil qilgan edi.

 

Mamlakatda epidemiologik vaziyat murakkablashib borayotgani sababli xalqaro hamkorlar tomonidan yordam ko‘rsatish ishlari kuchaytirilmoqda. Xususan, Kongo Demokratik Respublikasi Aloqa va ommaviy axborot vositalari vaziri Patrik Muyaiya Katembvening ma’lum qilishicha, Xitoydan kelgan tibbiyot mutaxassislari guruhi poytaxt Kinshasaga yetib kelgan.

 

Ularning asosiy vazifasi mahalliy tibbiyot xodimlariga ko‘maklashish, bemorlarni davolash va Ebola virusining yanada keng tarqalishining oldini olish bo‘yicha olib borilayotgan choralarni qo‘llab-quvvatlashdan iborat. Mutaxassislar missiyasi uch oy davom etishi rejalashtirilgan.

 

Ma’lumotlarga ko‘ra, Ebola epidemiyasi o‘tgan oy Kongo Demokratik Respublikasi va Ugandada qayd etilgan. Sog‘liqni saqlash sohasidagi ekspertlar ushbu epidemiya so‘nggi o‘n yilliklardagi eng yirik va eng halokatli avj olish holatlaridan biriga aylanishi mumkinligidan ogohlantirmoqda.