O‘zbekistonda parallel qurilish amaliyoti bekor qilinadi
Yangi tartibga ko‘ra, ishlar faqat ekspertizadan o‘tgan bosqichma-bosqich loyiha asosida amalga oshiriladi.
O‘zbekistonda joriy yilning 1-iyulidan boshlab yangi obyektlar bo‘yicha loyihalashtirish va qurilish-montaj ishlarini bir vaqtda amalga oshirish — ya’ni parallel qurilish amaliyoti bekor qilinadi. Bu haqda Prezidentning 104-sonli farmonida belgilangan.
Hujjatga muvofiq, endilikda tajriba-sinov tariqasida bosqichma-bosqich tayyorlanadigan loyiha asosida qurilish ishlarini amalga oshirish tartibi joriy etiladi. Ushbu tartib doirasida tadbirkorlik subyektlari o‘z mablag‘lari hamda jalb qilinadigan to‘g‘ridan-to‘g‘ri xorijiy investitsiyalar hisobidan moliyalashtiriladigan obyektlar (ko‘p kvartirali uy-joylar bundan mustasno) bo‘yicha qurilish-montaj ishlarini bosqichma-bosqich loyiha asosida bajarishi mumkin bo‘ladi.
Qurilish ishlari har bir bosqich bo‘yicha loyiha-smeta hujjatlari ekspertizadan o‘tkazilgach va inspeksiya tomonidan ro‘yxatga olingandan so‘ng reja-grafik asosida boshlanadi. Jarayonlar “Qurilishda davlat nazorati” elektron platformasi orqali doimiy monitoring qilinadi.
Shuningdek, byudjet mablag‘lari hisobidan moliyalashtiriladigan obyektlarda ham ushbu tartib faqat Prezident va Vazirlar Mahkamasi qaror va farmoyishlari asosida joriy etilishi mumkin.
Farmonga ko‘ra, Vazirlik va inspeksiya tomonidan 2027-yil yakuniga qadar tajriba-sinov natijalari tahlil qilinib, tizimni kengaytirish bo‘yicha takliflar Hukumatga kiritiladi.
Bundan tashqari, “Shaffof qurilish” milliy axborot tizimi doirasida ayrim davlat xaridlari bo‘yicha texnik topshiriqlarni ekspertizadan o‘tkazish amaliyoti bekor qilinadi.
Eslatib o'tamiz, avvalroq, qurilish sohasida korrupsiya xavfini kamaytirish maqsadida “sirli mijoz” mexanizmi joriy etilishi haqida xabar berilgan edi.
