O‘zbekistonda terrorizmni moliyalashtirishda ayblanib, 8 kishi qamaldi
Ular yuborgan pullar Falastindagi jabr ko‘rganlarga emas, Suriyadagi terroristik guruhlar ehtiyoji uchun sarflangani aniqlangan.
Davlat xavfsizlik xizmati va ichki ishlar organlari hamkorligida o‘tkazilgan tezkor tadbirlar davomida terrorizmni moliyalashtirish bilan shug‘ullangan bir guruh shaxslarning noqonuniy faoliyatiga chek qo‘yildi. Bu haqda DXX xabar berdi.
Ma’lum qilinishicha, Toshkent shahri hamda Samarqand, Buxoro, Andijon va Farg‘ona viloyatlarida yashovchi, 1987–1998-yillarda tug‘ilgan 8 nafar fuqaro Suriyada faoliyat yurituvchi “G‘uroba katibasi” terroristik tashkilotining media-blogeri, Qirg‘iziston fuqarosi Abdulmuhsin Usmonov ta’siriga tushib, uning nazoratidagi hisob-raqamlarga pul mablag‘lari o‘tkazib kelgan.
Tergov materiallariga ko‘ra, “Saad Muxtor” taxallusi bilan tanilgan Abdulmuhsin Usmonov “Telegram” messenjeri orqali Falastinda jabrlangan musulmonlarga yordam ko‘rsatish bahonasida xayriya mablag‘larini yig‘gan.
Biroq to‘plangan mablag‘lar Suriyadagi terroristik guruhlar ehtiyojlari uchun sarflangani aniqlangan.
Sud hukmiga ko‘ra, ushbu jinoyatga aloqador deb topilgan 7 nafar shaxs 3 yildan 8 yilgacha muddatga ozodlikdan mahrum etildi. Yana bir nafar sudlanuvchiga esa 4 yil 4 oy muddatga ozodlikni cheklash jazosi tayinlandi.
Jinoyat Kodeksining 155-3-moddasiga ko‘ra, terrorizmni moliyalashtirish 15 yilgacha ozodlikdan mahrum qilish bilan jazolanadi.
