Qozog‘istonda YTHga uchragan 17 yoshli qiz O‘zbekistonga qaytarildi
Latviyada insultni boshdan kechirgan va Rossiyada qiyin ahvolga tushib qolgan fuqarolar ham vatanga qaytarildi.
Qozog‘iston, Latviya va Rossiyada qiyin vaziyatga tushib qolgan O‘zbekiston fuqarolari vatanga qaytardi. Bu haqda Migratsiya agentligi matbuot xizmati ma’lum qildi.
Qayd etilishicha, fuqarolardan biri — 17 yoshli qiz Rossiyaga Qozog‘iston orqali avtotransportda yo‘l olayotgan vaqtda Atirau viloyatida yo‘l-transport hodisasiga uchragan. Oqibatda u og‘ir tan jarohatlari olib, bir necha marta jarrohlik amaliyotini boshdan kechirgan.
Respublika shoshilinch tibbiy yordam ilmiy markazi mutaxassisi ma’lumotiga ko‘ra, bemorda beshinchi bo‘yin umurtqasi singishi va orqa miya faoliyati buzilishi aniqlangan. U Atirauda ikki marta operatsiya qilinganidan so‘ng, intensiv terapiya nazorati ostida O‘zbekistonga olib kelingan.
Hozirda qiz Respublika shoshilinch tibbiy yordam ilmiy markazida davolanmoqda. Shifokorlarning bildirishicha, uning ahvoli qoniqarli.
Shuningdek, Latviyaga mustaqil ravishda ishlash uchun borgan yana bir O‘zbekiston fuqarosi ham vatanga qaytarilgan. Agentlik ma’lumotiga ko‘ra, u manzilga yetib borgach va’da qilingan ish o‘rni bilan ta’minlanmagan. Kuchli ruhiy bosim oqibatida esa insultni boshdan kechirgan. Davolanish jarayonidan so‘ng shifokorlar nazorati ostida O‘zbekistonga qaytishiga ruxsat berilgan.
Bundan tashqari, Rossiyada qiyin ahvolga tushib qolgan yana bir O‘zbekiston fuqarosi ham Sog‘liqni saqlash vazirligi tomonidan biriktirilgan shifokorlar kuzatuvida vatanga olib kelingan.
Migratsiya agentligi fuqarolarni xorijga ishlash uchun faqat xavfsiz, qonuniy va kafolatlangan yo‘llar orqali borishga chaqirdi.
Shuningdek, idora chet elda og‘ir vaziyatga tushib qolgan O‘zbekiston fuqarolariga yordam ko‘rsatish ishlari davom ettirilayotganini ma’lum qildi.
