Qirg‘izistonda terrorchilik hujumlarini rejalashtirgan 31 kishi qo'lga olindi
Operatsiya davomida qurol-yarog‘, ekstremistik adabiyotlar va naqd pul musodara qilindi.
Qirg‘iziston Milliy xavfsizlik davlat qo‘mitasi (GKNB) tomonidan O‘sh va Botken viloyatlarida o‘tkazilgan keng ko‘lamli aksilterror operatsiyasi davomida terrorchilik faoliyatida gumon qilinayotgan 31 nafar shaxs qo‘lga olindi. Bu haqda For.kg nashri xabar berdi.
Ma’lum qilinishicha, maxsus tadbirlar 9-iyun kuni amalga oshirilgan. Tergov ma’lumotlariga ko‘ra, qo‘lga olinganlar “Katiba at-Tavhid val-Jihod” hamda IShID terrorchilik tashkilotlari bilan aloqador bo‘lib, huquqni muhofaza qiluvchi organlar xodimlari va diniy yetakchilarga qarshi terrorchilik hujumlarini rejalashtirgan.
Operatsiya natijasida O‘sh viloyatida 11 nafar, Botken viloyatida esa 20 nafar gumonlanuvchi qo‘lga olingan.
Tintuvlar davomida diniy-ekstremistik mazmundagi materiallar, to‘rtta o‘qotar qurol hamda naqd pul mablag‘lari musodara qilingan.
Qirg‘iziston maxsus xizmatlari hozirda qo‘lga olinganlarning ehtimoliy sheriklarini aniqlash, shuningdek, guruhning moliyalashtirish manbalari va aloqalarini o‘rganish bo‘yicha tergov-surishtiruv ishlarini davom ettirmoqda.
