Toshkentda ayol haydovchini haqorat qilgan erkak 15 sutkaga qamaldi
Jabrlanuvchi ayolga himoya orderi berildi.
Toshkent shahrining Uchtepa tumanida ikki haydovchi o‘rtasida yuzaga kelgan janjal ijtimoiy tarmoqlarda muhokamalarga sabab bo‘ldi. Voqea aks etgan videoda erkak haydovchining ayolni haqorat qilayotgani hamda uning telefonini tortib olishga uringani ko‘ringan.
Poytaxt IIBB ma’lum qilishicha, hodisa 8-iyun kuni Uchtepa tumanidagi Haqiqat ko‘chasida sodir bo‘lgan. 41 yoshli Nexia 3 haydovchisi M.Sh. va 34 yoshli T.F. o‘rtasida yo‘l harakati jarayonida kelishmovchilik kelib chiqqan. Shundan so‘ng erkak haydovchi jamoat joyida haqoratomuz so‘zlar ishlatib, jamiyatda yurish-turish qoidalarini qasddan buzgan.
Holat yuzasidan M.Sh.ga nisbatan Ma’muriy javobgarlik to‘g‘risidagi kodeksning 183-moddasi (mayda bezorilik) bilan ma’muriy bayonnoma rasmiylashtirilgan.
Jinoyat ishlari bo‘yicha tuman sudi qaroriga ko‘ra, huquqbuzarga nisbatan 15 sutka muddatga ma’muriy qamoq jazosi tayinlangan.
Sud jarayonida jabrlanuvchi ayol voqeadan so‘ng ruhiy bosimni boshidan kechirganini bildirgan. Shuningdek, unga himoya orderi berilgan.
Ma’lum qilinishicha, sudda so‘zga chiqqan erkak haydovchi o‘z qilmishidan pushaymonligini bildirib, jabrlanuvchidan kechirim so‘ragan va bunday holat boshqa takrorlanmasligini aytgan.
