Ukraina dronlar bilan Rossiya tarix muzeyiga zarba berdi
Hozircha qurbonlar haqida rasmiy ma’lumot berilmagan.
Ukraina dronlari Rossiya nazorati ostidagi Qrimning Sevostopol shahridagi tarixiy muzeyga zarba berdi. Hozircha qurbonlar haqida rasmiy ma’lumot berilmagan. Bu haqida Reuters xabar qildi.
Qayd etilishicha, Qrim ma’muriyati dron hujumlari sabab tungi poyezdlar jadvaliga o‘zgartirishlar kiritgan. Bu qaror bir necha kun avval dron zarbasi oqibatida poyezd mashinisti yordamchisi halok bo‘lganidan keyin qabul qilingan.
10-iyun kuni ertalab Sevastopol hududida havo hujumi haqida ogohlantirish e'lon qilingan. Rossiya Mudofaa vazirligi Rossiya hududlari, shuningdek, Qora dengiz va anneksiya qilingan Qrim ustida 326 ta Ukraina dronlari yo'q qilinganini xabar qilgan.
Sevostopol gubernatori Mixail Razvojayev muzeyning tom qismi yonganini ma’lum qilgan. Unga ko‘ra, yong‘inni o‘chirish uchun 80 dan ortiq odam va 22 ta texnika jalb qilingan.
“Vahshiylar biz uchun qadrli narsalarga hujum qilib, tariximizni yo‘q qilishga harakat qilmoqda. Bizni bu bilan qo‘rqitib bo‘lmaydi. Sizlar faqat butun dunyoga o‘z yomon tarafingizni ko‘rsatyapsiz”, deya yozgan Mixail Razvojayev o‘zining Telegram kanalida.
Ma’lumot uchun, muzey 1853-1856-yillardagi Qrim urushiga bag‘ishlangan. Mazkur urushda Rossiya imperiyasi Usmonli imperiyasi, Buyuk Britaniya, Fransiya va Sardiniya qirolligidan iborat koalitsiyaga qarshi jang qilib, mag‘lub bo‘lgan.
