Eron muzokaralarni cho‘zayotgani uchun buning narxini to‘laydi — Tramp
AQSh prezidenti Tehronning harakatlarini tanqid qildi va yangi ogohlantirish berdi.
Donald Tramp Eronni muzokara jarayonini cho‘zishda ayblab, bu holat Tehron uchun jiddiy oqibatlarga olib kelishini ta’kidladi.
O‘zining Truth Social ijtimoiy tarmog‘idagi sahifasida e’lon qilgan bayonotida Tramp Eron kelishuvga erishish imkoniyatidan o‘z vaqtida foydalanmaganini qayd etgan.
“Ular o‘zlari uchun juda qulay bo‘lishi mumkin bo‘lgan kelishuv yuzasidan muzokaralar olib borishda haddan tashqari ko‘p vaqt yo‘qotdi va endi buning narxini to‘lashlariga to‘g‘ri keladi”, — degan AQSh prezidenti.
Shuningdek, Tramp Eron qurolli kuchlarining imkoniyatlari haqida ham fikr bildirib, mamlakatning harbiy salohiyati sezilarli darajada zaiflashganini ta'kidlagan.
AQSh Markaziy qo‘mondonligi avvalroq Hormuz bo‘g‘ozi yaqinida Apache vertolyoti bilan bog‘liq hodisadan so‘ng Eron hududidagi ayrim harbiy obyektlarga zarbalar berilganini ma’lum qilgan edi. Vashington ma’lumotlariga ko‘ra, hujumlar havo mudofaasi tizimlari, radar stansiyalari hamda boshqaruv infratuzilmasiga qaratilgan.
Tehron esa bunga javoban Yaqin Sharqdagi AQSh harbiy obyektlariga qarshi zarbalar uyushtirganini bildirgan.
