Qozog‘istonda jinsiy zo‘ravonlik ishlari ayol tergovchilarga topshiriladi

 

Qozog‘istonda jinsiy zo‘ravonlik va jinsiy tajovuz bilan bog‘liq jinoyat ishlarini tergov qilish uchun ayol tergovchilar tayinlanadi. Bu haqda mamlakat Ichki ishlar vaziri o‘rinbosari Sanjar Adilov ma’lum qildi deydi Kazinform.

 

Qayd etilishicha, yangi amaliyotning asosiy maqsadi jabrlanuvchilarning qo‘shimcha ruhiy bosim va psixologik travmaga duch kelishini kamaytirish, shuningdek, tergov organlariga bo‘lgan ishonchni mustahkamlashdan iborat.

 

Shuningdek, Ichki ishlar vazirligi majburiy nikoh bilan bog‘liq jinoyatlarni qo‘llash mexanizmlariga ham izoh bergan. Rasmiylarning ta’kidlashicha, bunday holatlarda jabrlanuvchi ayol ham, erkak ham bo‘lishi mumkin. Biroq shunchaki nikohga undash yoki taklif qilish jinoyat sifatida baholanmaydi.

 

Ma’lum qilinishicha, jinoyat tarkibi yuzaga kelishi uchun tahdid, bosim yoki zo‘ravonlik alomatlari mavjud bo‘lishi kerak. Aks holda, bunday munosabatlar fuqarolik-huquqiy masala sifatida ko‘riladi.

 

Rasmiy ma’lumotlarga ko‘ra, hozircha Qozog‘istonda majburiy nikoh bo‘yicha birorta ham jinoiy ish qo‘zg‘atilmagan. Eslatib o‘tamiz, mamlakatda majburiy nikoh 2025-yil sentabr oyidan boshlab jinoyat sifatida belgilangan.

 

Bundan tashqari, Qozog‘istonda ta’qib qilish (stalking) uchun ham jinoiy javobgarlik joriy etilgan bo‘lib, joriy yilning o‘zida mazkur turdagi 83 ta jinoyat ishi sudga yuborilgan.